Réttargæslumaður stúlkunnar ósammála sýknudómi Héraðsdóms Reykjavíkur

Réttargæslumaður stúlkunnar sem kærði nauðgun á Hótel Sögu í mars síðastliðnum segist ósammála sýknudómi Héraðsdóms Reykjavíkur. Dómurinn einblíni of mikið viðbrögð stúlkunnar frekar en verknaðinn. Lögmaður hins ákærða segir líklegt að hann eigi rétt á bótum eftir að hafa verið í gæsluvarðhaldi í fjóra mánuði.

Héraðsdómur Reykjavíkur sýknaði í gær tvítugan pólskan mann sem ákærður var fyrir nauðgun inn á salerni Hótel Sögu í mars síðastliðnum. Dómurinn taldi ljóst að samræðið hefði átt sér stað en ekki gegn vilja stúlkunnar. Margrét Gunnlaugsdóttir réttargæslumaður stúlkunnar segir dóminn koma sér verulega á óvart og hún sé ósammála niðurstöðunni. Verknaðurinn liggi fyrir en hann teljist ekki ofbeldi í skilningi hegningarlaganna.

Sveinn Andri Sveinsson lögmaður ákærða segir niðurstöðu dómsins rétta miðað við þá sönnunarfærslu sem hafi farið fram í málinu. Komið hafi mjög skýrt fram við flutning málsins þegar stúlkan hafi verið spurð hvort hún hefði með orði eða látæði gefið til kynna að hún vildi ekki hafa mök við manninn. Hún hafi sagt nei og bar því við að hafa frosið og ekkert getað aðhafst. Um leið og hún hafi fundið til sársauka hafi hún ýtt manninum frá sér og hann hætt samstundis. Þessi frásögn væri einnig í samræmi við framburð mannsins.

Sveinn Andri segir að þarna vanti nauðungina þ.e.a.s. að hann hafi þröngvað henni til maka. Hann segir fjögurra mánuða gæsluvarðhald hafa haft mjög sálræn áhrif á manninn og líklegt sé að hann eigi rétt á skaðabótum. Ekki er enn ljóst hvort málinu verði áfrýjað til Hæstaréttar.