Traustið skiptir okkur miklu máli

Seðlabankastjóri segir mikilvægt að varðveita traustið alveg eins og gullið í bönkunum. Davíð Oddsson, seðlabankastjóri, segir að þegar nýr banki ryður sér til rúms á nýjum mörkuðum þá snerti hann samkeppnisaðila.

"Bankinn stígur á tær og hann þarf að átta sig á því að það eru ekki allir bræður í þeim leik. Því þarf upplýsingagjöf að vera mjög ákveðin, en auðvitað sanngjörn, eðlileg og sönn um leið. Traust á þessum markaði er það sem öllu máli skiptir. Það á sérstaklega við um lítið land eins og okkar, sem byggir ekki á langri hefð að bankar séu með umsvif á erlendum skuldabréfamörkuðum."

Davíð segir að Seðlabankinn hafi tekið eftir að álag á bréfum bankanna hefði hækkað á erlendum mörkuðum. Í kjölfar umfjöllunar Royal Bank of Scotland hafi verið óskað upplýsinga frá íslensku bönkunum. Mikilvægt sé að vera vakandi fyrir allri gagnrýni þó hún sé ekki alltaf sett fram af sanngirni. Tiltölulega lítill en áhrifamikill hópur fylgist með þessum umræðum. Það sé þekkt á þessum markaði að það myndast ákveðið hjarðeðli, eins og talað er um, sem geti reynst hættulegt. Því þurfi að kynna stöðu og styrk KB banka og annarra íslenskra banka til að koma réttum upplýsingum á framfæri. Mat alþjóðlegra stofnana, sem sérhæfa sig í að meta rekstur banka, sem og eftirlitskerfi íslenskra stjórnvalda bendi til að íslensku bankarnir fari með gát.

"Við teljum að bankarnir séu færir um að fjármagna sig áfram og séu ekki neinni nauðvörn með það. Þeir ráði yfir nægjanlega öflugu skammtímafé til að standa af sér einhverjar sveiflur og tal. Það á allt að vera í góðu lagi. Við og Fjármálaeftirlitið höldum auðvitað áfram að fylgjast með mjög nákvæmlega og leggjum áherslu á að vera í góðu sambandi við bankastofnanir hér því það er þýðingarmikið fyrir landið í heild að enginn hnökri komi á. Við þurfum að hafa gott mat á okkar fjárhagslegri stöðu, ekki bara ríkið heldur líka mikilvægar stofnanir. Menn þurfa að varðveita traustið, alveg eins og gullið," segir Davíð.