SPRON verður hlutafélag skráð í kauphöll

Stefnt er að hlutafélagavæðingu Sparisjóðs Reykjavíkur og nágrennis (SPRON) og skráningu í Kauphöllina fyrir lok septembermánaðar. Að beiðni stjórnar SPRON hefur Capacent lokið mati á verðmæti sjóðsins. Undir lok næsta mánaðar verður leitað samþykkis stofnfjáreigenda eftir löglega auglýstan fund.

Að sögn Guðmundar Haukssonar, sparisjóðsstjóra SPRON, gerir áætlun ráð fyrir að 85 prósent sjóðsins verði í eigu stofnfjáreigendanna, en 15 prósentin sem eftir standa, sem svara til níu milljarða króna, renni inn í sjálfseignarstofnun sem heimild hafi til að láta fjármuni renna til menningar- og líknarmála á starfssvæði sjóðsins. „Með þessu yrði til einn stærsti sjálfseignarsjóður sinnar tegundar,“ segir Guðmundur.

Hlutur stofnfjáreigenda næmi því 51 milljarði króna og heildarverðmæti SPRON metið á 60 milljarða króna. Guðmundur segir ekki hafa verið tekna ákvörðun um hvort farið verði í hlutafjáraukningu samhliða skráningu sjóðsins í kauphöll.

Guðmundur telur breytt rekstrarform í raun forsendu þess að sparisjóðurinn fái tekið þátt í samkeppni við banka. Sem hlutafélag geti SPRON farið fram á mat alþjóðlegra matsfyrirtækja á lánshæfi sínu og þar með fengið betri kjör á bankamarkaði með lánsfé. Þá geti hann eftir breytinguna stækkað með samruna við önnur fjármálafyrirtæki, en sú leið sé nú ófær. „Rétt er hins vegar að taka fram að um slíkt eru engin áform núna,“ segir hann.

Guðmundur segir að þótt SPRON hafi vegnað vel á undanförnum árum og stofnfjármarkaður sparisjóðsins hafi skilað honum umtalsverðum verðmætum þá telji stjórn sjóðsins að öll lagaumgjörð hlutafélaga sé skýrari og að fyrir fjárfesta sem setji peninga í SPRON sé æskilegra að fjárfesta í hlutabréfum fremur en í annarri tegund verðbréfa.

Stofnfjármarkaður fyrir stofnfjárbréf SPRON var stofnaður árið 2004. „Sá markaður hefur gengið býsna vel, stofnfjáreigendur eru um 1.350 talsins og hefur fjölgað talsvert að undanförnu.

Breytt rekstrarform segir Guðmundur um leið að hafi engin áhrif á stefnu sjóðsins sem eftir sem áður leggi áherslu á að rækta sambandið við viðskiptavini sína og á að sjóðurinn sé góður vinnustaður. „Þessi breyting er formbreyting, ekki stefnubreyting.“ Þá segir Guðmundur að breytt rekstrarform breyti engu um það samstarf sem SPRON eigi í við aðra sparisjóði. SPRON verði áfram aðili að Sambandi sparisjóða sem séu hagsmunasamtök og taki þátt í fræðslustarfi, en standi eftir sem áður fyrir utan samstarf sjóðanna um markaðsmál.