Ríkið heggur ekki á hnútinn

Allar hugmyndir um björgun hjúkrunarheimilsins Eirar, sem fela í sér að ríkið leggi til peninga, hafa verið slegnar út af borðinu. Búist er við átökum á fulltrúaráðsfundi sem haldinn verður á föstudag.

Síðan að upplýsingar um slæma fjárhagsstöðu hjúkrunarheimilsins Eirar komu upp á yfirborðið hefur ýmislegt verið reynt til að bjarga málum.

Sérstakt aðgerðarteymi var stofnað en í þeimi hópi eru meðal annars fulltrúar frá Reykjavíkurborg, Mosfellsbæ, Ríkinu, íbúum, Lex lögmannsstofu og KPMG endurskoðunarfyrirtækinu.

Hópurinn hefur rætt við kröfuhafa, lífeyrisjóði og íbúðalánasjóð og unnið að því finna leiðir til að koma hjúkrunarheimilinu í skjól. Af þessum leiðum hafa nokkrar gert ráð fyrir að ríkið leggi til fjármagn og þá aðallega til að tryggja að íbúðarétthafar glati ekki þeim tveimur milljörðum sem þeir eiga inni hjá Eir. En samkvæmt heimildum fréttastofu hafa allar slíkar hugmyndir verið slegnar af borðinu.

Eins og staðan er núna bendir því ekkert til þess ríkið komi til móts við hjúkrunarheimilið með beinu fjárframlagi.

Það þýðir þó ekki endilega að öll nótt sé úti enn. Aðgerðarteymið fundar næst á fimmtudag og stefnir að því að kynna einhvers konar tillögu að lausn jafnvel í næstu viku.

Á sama tíma er hver höndin upp á móti annarri í stjórn hjúkrunarheimilisins. Stjórnin er klofin á milli þeirra sem vilja algjöra endurnýjun í stjórn og fulltrúarráði og þeirra sem vilja sitja áfram. Því er búist við átakafundi næsta föstudag þegar fulltrúaráð kemur saman á föstudaginn til að kjósa nýja stjórna.