Nokkur hreindýr sluppu frá veiðimönnum

Hreindýraveiðitímabilinu er nú lokið. Ekki tókst að veiða uppí kvóta.

„Endaði í raun alveg framar vonum,“ segir Jóhann G. Gunnarsson starfsmaður umhverfisstofnunar á Egilsstöðum. Jóhann hefur umsjá með hreindýraveiðum en tímabilinu lauk nú í vikunni.

Til stóð að veiða 1.300 dýr en þegar tímabilið er gert upp kemur á daginn að nokkur dýr sluppu frá kúlum byssumanna. Reyndar stefndi lengi vel í það að talsvert fleiri dýr myndu sleppa því um 120 dýr átti eftir að veiða þegar fimm dagar voru eftir af tímabilinu. Það hefur því verið margt um manninn á hreindýraslóð.

„Sumir mæta ekki til veiða og hafa ekki rænu á að skila leyfunum inn fyrr en það er orðið of seint,“ segir Jóhann. Og einhverjir mættu austur en náðu ekki að fella dýr sín.

Eins og áður sagði var kvótinn þrettán hundruð dýr. Eftirfarandi náðist ekki:

Svæði 1 – kýr 1 leyfi

Svæði 6 – kýr 1 leyfi

Svæði 7 – kýr 10 leyfi, tarfar 4 leyfi

Svæði 8 – kýr 6 leyfi, tarfur 1 leyfi

Svæði 9 – kýr 5 leyfi, tarfur 1 leyfi

Veiðar á kúm, þessar fimm sem til stóð að veiða á hefðbundnum tíma var stöðvuð vegna fárra kúa á svæðinu. Og að sögn Jóhanns var erfitt að úthluta kúm á svæði 8 þar sem aðal- og varaumsóknir voru búnar.

Veiðitími tarfa er frá 1. ágúst til og með 15. september, en þó getur mhverfisstofnun heimilað veiðar á törfum frá og með 15. júlí. Veiðitími kúa er frá 1. ágúst til 20. september. Verð fyrir veiðileyfin eru að 135.000 krónur þarf að greiða fyrir tarfaleyfi og 80.000 krónur fyrir kú.