Guðrún Helgadóttir Borgarlistamaður Reykjavíkur

Guðrún Helgadóttir rithöfundur hlaut í dag heiðursviðurkenningu. Dagur B. Eggertsson, borgarstjóri, útnefndi hana Borgarlistamann Reykjavíkur ársins 2017 í athöfn við Höfða.

Markað sérstök spor

Í fréttatilkynningu segir að Guðrún hafi með listsköpun sinni „skarað fram úr og markað sérstök spor í íslensku listalífi.“

Skáldverkið Jón Odd og Jón Bjarna gaf Guðrún út árið 1974 en það var jafnframt hennar fyrsta bók. Allar götur síðan hefur hún verið einn vinsælasti og virtasti barnabókahöfundur Íslands.

Barnabókahöfundur í fremstu röð

Í heild hefur Guðrún gefið út 25 bækur sem íslensk ungmenni hafa notið góðs af. Verkin hafa verið þýdd á fjölmörg tungumál í Evrópu, Bandaríkjunum og Asíu. Guðrún er í hópi barnabókahöfunda í fremstu röð en bæði heima og erlendis hefur henni verið skipað á bekk með barnabókahöfundum á borð við Astrid Lindgren og Thorbjörn Egner.

Bækurnar hafa til að bera góðan og gildan boðskap en réttur og staða þeirra sem minna mega sín eru rithöfundinum ofarlega í huga.

Formaður menningar-og ferðamálaráðs, Elsa Hrafnhildur Yeoman, gerði grein fyrir vali ráðsins á rithöfundinum ástsæla. Guðrúnu var veittur ágrafinn steinn, heiðursskjal og viðurkenningarfé.

Verðlaunahöfundur

Nú þegar hefur Guðrún hlotið ýmis virt verðlaun fyrir störf sín svo sem Norrænu barnabókarverðlaunin, Barnabókaverðlaun skóla- og frístundaráðs Reykjavíkur, Bókaverðlaun barnanna og Verðlaun Jónasar Hallgrímssonar fyrir framlag sitt til íslenskrar tungu. Þá hefur Guðrún hlotið stórriddarakross Fálkaorðunnar.