Erlent

Argentínska þingið heimilar þungunar­rof

Atli Ísleifsson skrifar
Stuðningsmenn lagabreytingarinnar fögnuðu á götum Buenos Aires í nótt eftir að niðurstaða öldungadeildarinnar lá fyrir.
Stuðningsmenn lagabreytingarinnar fögnuðu á götum Buenos Aires í nótt eftir að niðurstaða öldungadeildarinnar lá fyrir. AP

Meirihluti öldungadeildar argentínska þingsins hefur samþykkt að konum verði heimilt að gangast undir þungunarrof fram í fjórtándu viku meðgöngu. Spennustigið á götum höfuðborgarinnar Buenos Aires hefur verið hátt síðustu vikurnar vegna málsins þar sem stuðningsmenn og andstæðingar lagabreytingarinnar hafa safnast saman. 

Konur í Argentínu hafa til þessa einungis fengið að gangast undir þungunarrof ef þær hafa orðið barnshafandi af völdum nauðgunar, eða þá að líf þeirra sé talið í hættu.

Lagabreytingin, sem neðri deild þingsins samþykkti fyrr í mánuðinum og öldungadeildin samþykkti í nótt, veitir konum heimild til að rjúfa þungun fram í fjórtándu viku meðgöngu.

Öldungadeildin hafnaði sambærilegri breytingu á lögum í atkvæðagreiðslu fyrir um tveimur árum þegar 38 þingmenn greiddu atkvæði gegn, en 31 með.

Eftir maraþonumræður greiddu nú 38 þingmenn atkvæði með breytingunni, en 29 gegn. Einn þingmaður sat hjá.

Áður hafði forsetinn Alberto Fernández sagst vera samþykkur lagabreytingu, en kaþólska kirkjan í Argentínu, sem hefur mikil ítök í landinu, lagðist gegn henni.

Um mikil tímamót er að ræða í Argentínu þar sem fyrir finnst einhver strangasta löggjöf heims er varðar þungunarrof.

Argentína Þungunarrof
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið