Hæsta út­hlutun Af­reks­sjóðs ÍSÍ frá upp­hafi

Þetta kom fram í tilkynningu Íþrótta- og Ólympíusambands Íslands.

Áhrif kórónufaraldursins á alþjóðlegt afreksíþróttastarf var umtalsvert á árinu sem er að líða og gerði það að verkum að fjölmargir alþjóðlegir íþróttaviðburðir var frestað eða einfaldlega felldir niður.

„Afreksíþróttastarf sérsambanda ÍSÍ varð þannig fyrir miklum áhrifum og ekki var farið í verkefni með sama hætti og áætlanir gerðu ráð fyrir. Vegna þessa hefur þurft að fella niður hluta af fyrri styrkveitingu til sérsambanda vegna verkefna ársins 2020 og er þeim fjármunum nú úthlutað til sérsambanda samkvæmt reglugerð sjóðsins, en þó með þeim fyrirvara að endanlegar niðurfellingar verða endurskoðaðar þegar ársreikningar sérsambanda liggja fyrir,“ segir í tilkynningu ÍSÍ.

„Framlag ríkisins til Afrekssjóðs ÍSÍ hefur hækkað mikið á undanförnum árum og var fyrir árið 2020 að upphæð 400 milljónir króna. Framlag ríkisins vegna 2021 lækkar um átta milljónir króna frá síðustu árum og verður nú 392 milljónir króna. Afrekssjóður ÍSÍ er annars fjármagnaður með hlutdeild úr tekjum íþróttahreyfingarinnar frá Íslenskri Getspá samkvæmt ákvörðun Íþróttaþings ÍSÍ.“

„Til Afrekssjóðs ÍSÍ bárust umsóknir frá 31 sérsambandi. Að þessu sinni hljóta 30 sérsambönd styrk vegna afreksíþróttastarfs og landsliðsverkefna og er um misháar upphæðir sé að ræða. Heildarkostnaður afreksíþróttastarfs hjá þeim sérsamböndum sem sóttu um til Afrekssjóðs ÍSÍ vegna ársins 2021 nema um 2.549 m.kr. og er stuðningur sjóðsins því að meðaltali um 20 prósent af kostnaði sérsambanda, en þess má þó geta að árið 2016 var hlutfallið um 11 prósent,“ segir einnig í tilkynningunni.

„Á næsta ári eru margir stórviðburðir á dagskrá eins og HM í handknattleik karla sem er í upphafi árs og Ólympíuleikar og Ólympíumót fatlaðra í Tókýó. Vorið fram undan er mjög mikilvægt keppendum í íþróttagreinum þar sem lágmörk og staða á heimslista ræður því hverjir vinna sér inn keppnisrétt á leikana í Tókýó og verður spennandi að fylgjast með árangri íslenskra keppenda á næstu misserum. Sérstaklega eftir óvenjulegt ár 2020.“

Áherslur ÍSÍ varðandi afreksstyrki mótast af Afreksstefnu ÍSÍ þar sem segir:

„Meginhlutverk Afrekssjóðs ÍSÍ í uppbyggingu afreksíþrótta á Íslandi er að styðja sérsambönd fjárhagslega og þar með íslenskt afreksíþróttafólk við að ná árangri í alþjóðlegri keppni. Forsenda styrkveitinga er að sérsambönd hafi markvissa og raunhæfa afreksstefnu, ásamt aðgerðaráætlun. Stuðningur sjóðsins felst í fjárframlögum vegna verkefna sem skulu vera fyrir fram skilgreind í aðgerðaráætlun viðkomandi sérsambands,“ segir að lokum.