Allmikil lægð í kortunum á aðfangadag

Sunna Kristín Hilmarsdóttir skrifar 21. desember 2020 07:01

Úrkomuspá Veðurstofunnar klukkan sex á aðfangadag. Það er spáð rigningu, ekki snjókomu, svo rauð jól eru mun líklegri en hvít þetta árið. Veðurstofa Íslands

„Eftir erfið veður síðustu daga, þótt sunnan- og vestanvert landið hafi sloppið ágætlega frá þessu, taka við mun rólegri dagar.“

Svona hefjast hugleiðingar veðurfræðings á vef Veðurstofu Íslands þennan mánudagsmorguninn en eins og kunnugt er urðu miklar hamfarir á Seyðisfirði í liðinni viku vegna metúrkomu sem féll þar og hafði í för með sér gríðarlegar aurskriður með tilheyrandi eyðileggingu í bænum.

Þrátt fyrir rólegri daga fram undan veðrinu gæti engu að síður snjóað eða rignt, eða jafnvel komið slydda, vestantil á landinu seint á morgun og á Þorláksmessu.

Þá er allmikil lægð væntanleg á aðfangadag en henni mun fylgja töluverð rigning og umtalsverð hlýindi. Mesta úrkoman verður bundin við Suður- og Vesturland.

Á jóladag er síðan spáð suðvestanátt með éljum svo hlýindin vara ekki lengi að þessu sinni.

„Austanvert landið sleppur að mestu við úrkomu þessa dagana, enda hafa þeir fengið skammtinn sinn og rúmlega það,“ segir í hugleiðingum veðurfræðings.

Gul viðvörun er svo í gildi fram eftir morgni á Faxaflóa, Breiðafirði, Vestfjörðum, Ströndum og Norðurlandi vestra vegna storms og hríðarveðurs en nánari upplýsingar má nálgast hér á viðvörunarvef Veðurstofunnar.

Veðurhorfur á landinu:

Norðlæg átt 13-23 m/s, hvassast NV-til, en mun hægari vindur S- og A-lands. Slydda eða snjókoma um landið N- og A-vert. Norðaustan 10-18 og víða él með morgninum, einkum um landið NA-vert.

Dregur úr vindi í dag, norðaustan 5-13 seinnipartinn með dálitlum éljum fyrir norðan og austan. Kólnandi, frost 0 til 8 stig í kvöld, milsast syðst.

Vestlæg átt, 5-13 á morgun. Él eftir hádegi N- og V-til, fyrst á Vestfjörðum. Frost 3 til 14 stig, kaldast inn til landsins norðaustanlands, en 0 til 5 stiga frost vestast.

Á þriðjudag:

Vestlæg átt 5-13, hvassast NV-til. Bjart með köflum, en él V-lands síðdegis. Frost 0 til 14 stig, kaldast í innsveitum fyrir norðan.

Á miðvikudag (Þorláksmessa):

Vestan 3-8 og skýjað með köflum, en suðlægari og dálítil él vestast. Áfram kalt í veðri, en mun mildara vestantil.

Á fimmtudag (aðfangadagur jóla):

Gengur í hvassa sunnanátt með rigningu, einkum S- og V-lands. Hlýnar talsvert.

Á föstudag (jóladagur):

Suðvestanátt og él, en léttskýjað A-lands. Kólnandi veður.

Á laugardag (annar í jólum):

Vestlæg eða breytileg átt og víða þurrt. Frost um allt land.

Veður