Erlent

Skattamál Hunters Biden til rannsóknar

Elín Margrét Böðvarsdóttir skrifar
Joe Biden faðmar son sinn Hunter Biden eftir forsetakosningarnar.
Joe Biden faðmar son sinn Hunter Biden eftir forsetakosningarnar. EPA/ANDREW HARNIK

Saksóknari í Delaware fer nú fyrir rannsókn á skattamálum Hunters Biden, sonar Joe Biden verðandi Bandaríkjaforseta. Sjálfur segist Hunter Biden líta rannsóknina „mjög alvarlegum“ augum en kveðst fullviss um að „hlutlaus úttekt“ muni leiða í ljós að hann hafi staðið skil á sköttum og gjöldum „samkvæmt lögum og með viðeigandi hætti,“ að því er fram kemur í frétt BBC nú í kvöld.

Repúbikanar beindu spjótum sínum að Hunter Biden í kosningabaráttunni í aðdraganda kosninganna sem fram fóru vestanhafs í nóvember. Aðkoma hans að stjórn úkraínska orkufyrirtækisins Burisma vöktu tortryggni um svipað leiti og vantrauststillaga á heldur Donalds Trump, fráfarandi Bandaríkjaforseta, var til umfjöllunnar fyrr á þessu ári.

Hunter Biden hefur áður sagt að það hafi verið dómgreindarleysi af sinni hálfu að sitja í stjórn fyrirtækisins á sama tíma og faðir hans rak stefnu Bandaríkjastjórnar í Úkraínu.

„Ég komst að því í gær að skrifstofa ríkissaksóknara í Delaware hafi ráðlagt lögfræðingum mínum, líka í gær, að skattamál mín sæti rannsókn. Ég tek málinu mjög alvarlega en er fullviss um að fagleg og hlutlaus skoðun þessara mála muni leiða í ljós að ég hafi staðið að mínum málum með löglegum og viðeigandi hætti,“ segir í yfirlýsingu frá Hunter Biden sem vitnað er í í frétt CNN af málinu.

Að því er fram kemur í frétt CNN beinist rannsóknin meðal annars að því hvort Biden og hans viðskiptafélagar hafi framið skattalagabrot og peningaþvætti með viðskiptum sínum á erlendri grundu, einkum í Kína.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×