Katrín Tanja og hin bestu í heimi vita nú allar tímasetningar í ofurúrslitunum

CrossFit samtökin hafa nú gefið út allar tímasetningar í keppninni um heimsmeistaratitilinn en ofurúrslitin fara fram í norður Kaliforníu frá 23. til 25. október.

Áður var búið að gefa það út að lokaúrslitin áttu að fara fram 19. til 25. október en nú er ljóst að fyrstu fjórir dagarnir munu fara fram í að búa til búbbluna sem með keppendum og starfsfólki.

Allir keppendurnir í ofurúrslitunum eru staddir í Bandaríkjunum en hinir erlendu keppendurnir stunda líka æfingar í Bandaríkjunum eins og Katrín Tanja.

Katrín Tanja hefur æft hjá þjálfaranum sínum Ben Bergeron í CrossFit New England stöðinni í Natick í Massachusetts fylki og talaði um það eftir fyrri hlutan að hún hefði ekki komið til Íslands síðan í ársbyrjun.

Nú styttist aftur á móti í það að úrslitin ráðist og tímabilið klárist en eftir það mun Katrín Tanja koma beinustu leið heim til Íslands.

CrossFit samtökin gaf í gær út frekar nákvæma tímasetningu á lokaúrslitunum og það er ekki hægt að sjá annað en að greinarnar verði tíu talsins, fjórar á föstudeginum og svo þrjár á laugardegi og sunnudegi.

Fyrsta greinin á að fara fram milli 8 og 9.30 á föstudagsmorguninn á staðartíma sem er Kyrrahafstími. Sú grein fer því fram á milli 15 og 16.30 að íslenskum tíma.

Síðasta grein föstudagsins fer því ekki fram fyrr en á milli ellefu og hálf eitt aðfaranótt laugardagsins og því gæti verið krefjandi fyrir stuðningsfólk Katrínar Tönju að fylgjast með henni heima á Íslandi svo seint.

Katrín Tanja var í beinni á Zoom með vinum sínum og fjölskyldu þegar hún keppti í fyrsta hlutanum en ekki er vitað hvort hún geti haft sama hátt á nú.

Þá mátti enginn vita hvernig henni gekk en nú verður allt í beinni hjá CrossFit samtökunum bæði í gegnum Facebook og YouTube sem og gegnum heimasíðuna games.crossfit.com.

Katrín Tanja keppir við fjórar aðrar konur um heimsmeistaratitilinn en þær eru Tia-Clair Toomey, Brooke Wells, Haley Adams og Kari Pearce. Hjá körlunum keppa Mat Fraser, Noah Ohlsen, Justin Medeiros, Samuel Kwant og Canadian Jeffrey Adler.

Það er líka ljóst að sá sem stendur uppi sem heimsmeistari fær 300 þúsund Bandaríkjadali í verðlaunafé eða tæpar 42 milljónir íslenskra króna. Í heildina munu keppendur fá 1,7 milljónir dollara í verðlaunafé eða rúmar 236 milljónir króna.