Þrír handteknir vegna líkamsárásar í Árbæ

Karlmaður er ekki talinn alvarlega slasaður eftir að hann varð fyrir líkamsárás við Rauðás í Árbæ nú um miðjan dag. Lögregla telur að hnífur hafi verið notaður við árásina en þrír voru handteknir á vettvangi.

Tilkynnt var um árásina klukkan 13:36 en Valgarður Valgarðsson, aðalvarðstjóri hjá lögreglunni á höfuðborgarsvæðinu, segir við Vísi að allt sé óljóst um málsatvik. Mbl.is sagði fyrst frá árásinni. Maður virðist hafa verið stunginn með hníf en Valgarður segist ekki telja að hann sé alvarlega sár.

Árásin er nú til rannsóknar en Valgarður segir alls óljóst hvort hún hafi tengst einhvers konar uppgjöri eða öðru.