Næstum því allir spekingarnir spáðu því að Sara Sigmundsdóttir og Björgvin Karl Guðmundsson myndu komast áfram í ofurúrslitin á heimsleikunum í CrossFit en annað kom á daginn. Það munaði ekki miklu hjá Björgvini en Sara var aldrei nálægt því að komast í fimm manna úrslitin.

Snorri Barón Jónsson, umboðsmaður Söru og Björgvin Karls, hefur tjáð sig um vonbrigðin frá helginni en hann var mættur til að styðja við bakið á sínu fólki sem kepptu bæði í CrossFit Hengli í Hveragerði.

Sara Sigmundsdóttir endaði sextán sætum og 170 stigum frá sæti í ofurúrslitunum en hjá Björgvini Karli þá munaði aðeins 14 stigum og þremur sætum.

„Löngu, handahófskenndu og stormasömu 2020 tímabili er á enda runnið fyrir mig og CrossFit íþróttafólkinu sem ég vinn með,“ skrifaði Snorri Barón Jónsson á Instagram reikninginn sinn.

„Þessi helgi fór ekki eins og við höfðum vonast til. Þetta var aftur á móti lærdómsríkt og ég er vissum að við finnum fullt af jákvæðum hlutum þegar við erum búin að jafna okkur á vonbrigðunum,“ skrifaði Snorri Barón.

„Af hverju varaði enginn við mig því að það fylgdu því svona miklar tilfinningar að vera umboðsmaður íþróttafólks? Ég sá þessa krakka gefa gjörsamlega allt sitt á hverjum degi á æfingum til að undirbúa sig fyrir að keppa þegar það munar svo litlu og minnstu mistök eru svo afdrifarík,“ skrifaði Snorri Barón.

Björgvin Karl Guðmundsson var á verðlaunapalli á heimsleikunum í fyrra og hafði náð öðru sæti á 2020 Rogue Invitational mótinu í sumar sem var líka netmót þeirra bestu í heimi.

Það var búist við miklu af Söru sem var búin að eiga frábært tímabil en enn á ný fór allt úrskeiðis hjá henni á heimsleikunum. Sara vann The Open annað árið í röð og náði líka öðru sætinu á Rogue Invitational mótinu. Hún var líka búin að vera mjög öflug á netmótum. Það var ekki bara að það að hún missti af einu af fimm efstu sætunum heldur var hún aldrei með í keppninni og í hópi neðstu kvenna allt mótið.

Sara sýndi þó mikinn karakter með því að enda á fínni frammistöðu í lokagreininni og tókst fyrir vikið að koma sér upp í 21. sætið.

„Þegar hlutirnir ganga ekki upp þá er það mjög sárt og í dag líður mér eins og olíuskipi sem er búið að klessa á ísjaka. 2021 tímabilið getur ekki komið nógu snemma. Vonandi förum við þá að keppa fyrir framan ljósin og fullar stúkur af áhorfendum,“ skrifaði Snorri Barón.

Hann endaði á því að segja: „Bakslag er bara upphafið að endurkomunni,“ skrifaði Snorri Barón eins og sjá má hér fyrir neðan.