Lífið

Allt úr engu: Risarækjur, súrar gúrkur og hvítt súkkulaði

Sylvía Rut Sigfúsdóttir skrifar
Þættirnir Allt úr engu fóru af stað á dögunum á Stöð 2.
Þættirnir Allt úr engu fóru af stað á dögunum á Stöð 2. Mynd/Allt úr engu

Í þáttunum Allt úr engu fjallar matreiðslumaðurinn Davíð Örn Hákonarson um allt sem tengist mat og hvernig við getum nýtt hráefnið sem best og spornað við matarsóun í framhaldinu. Hann heimsækir áhugavert fólk og eldar með því frábærar máltíðir með því að nýta það sem er til á heimilinu. Í þætti kvöldsins skoðar Davíð Örn eldhúsið og ísskápinn hjá Áslaugu Örnu Sigurbjörnsdóttur ráðherra og töfrar fram girnilega rétti. 

Hér fyrir neðan má finna uppskriftirnar úr öðrum þætti. 

Salatgratín 

Fyrir 6-8 manns

  • 500 ml. epladjús
  • 1 sellerístöng
  • 1 agúrka - Hýði og kjarni (stökki parturinn skorinn í teninga notaður sem meðlæti í eftirréttinn)
  • 6 - 7 greinar ferskt dill
  • 2 góðar matskeiðar flórsykur
  • Safi frá 1 - 2 súraldin - einnig er hægt að rífa örlítið af berkinum fyrir meira bragð

Tip: Hægt að nota nokkur salatblöð, smá spínat eða meira sellerí fyrir meira bragð

Setjið allt saman í blender í 30 sek til 1 mín, eða þar til að hráefnin eru orðin vel maukuð og bragðið frá þeim komið út í djúsinn.

Sigtið ofan í plastdall eða glerbakka og smakkið til með súraldin og/eða flórsykri. Bragðið á að vera súrsætt með fersku bragði af agúrku og sellerí.

Setjið bakkann í frysti þangað til vökvinn er orðinn gaddfreðinn.

Takið bakkann út og brjótið ísinn í smáa bita. Setjið í blender þangað til vökvinn er orðinn að krapi. Setjið í box og aftur inn í frysti.

Tip: Til að flýta fyrir frystingu, setjið grynnra lagið af vökva í bakkann sem þið setjið í frystinn. Það mun gera það að verkum að vökvinn frýs hraðar. Því grynnra lag, því betra!

Mynd/Allt úr engu

Hvít súkkulaði og skyrkrem 

Fyrir 8-10 manns

  • 300 gr. hvítt súkkulaði
  • 175 gr. rjómi
  • 325 gr. skyr

Setjið hvítt súkkulaði í pott ásamt rjómanum og bræðið saman við vægan hita.

Takið pottinn af hitanum og pískið skyrið út í. Komið kreminu fyrir í íláti og skellið því í kæli og leyfið því að stífna í 1-2 klukkustund.

Mynd/Allt úr engu

Krystallað hvítt súkkulaði  

6-8 manns

  • 100 gr. vatn
  • 100 gr. sykur
  • 150 gr. hvítt súkkulaði

Setjið sykur og vatn í pott og sjóðið saman í síróp þar til hitinn nær uþb. 120 gráðum.

Bræðið súkkulaðið í örbylgjuofni, potti eða vantsbaði.

Setjið brædda súkkulaðið í skál eða í hrærivél, einnig er hægt að nota rafmagnspísk, og pískið heitu sykursírópinu út í súkkulaðið í mjórri bunu. Súkkulaðið ætti núna að verða orðið að “hrauni” og tilbúið til notkunar þegar það hefur kólnað örlítið.

Sýrðar agúrkur

  • 100 gr. vatn
  • 100 gr. sykur
  • 100 gr. edik

1 gúrka skorin í þunnar skífur (ef nota á agúrkurnar í eftirréttinn er gott að salta þær ekki fyrir súrsun) og söltuð með flögusalti í uþb. 10 mínútur.

Setjið vatn, sykur og edik í pott, setjið á vægan hita og leysið upp sykurinn. Hægt er að krydda vökvann með hverju sem er jafnvel hvönn eins og ég gerði í þættinum.

Setjið agúrkurnar í krukku og hellið volgum vökvanum yfir agúrkurnar. Þetta geymist í kæli í allt að endalokum veraldar.

Mynd/Allt úr engu

Risarækjur með grilluðum agúrkum og strandjurtum 

Fyrir 6-8 manns

  • 1 stk laukur - saxaður fínt
  • 3 geirar hvítlaukur - saxaður fínt
  • 2 msk. ferskur grænn pipar - saxaður fínt (einnig er hægt að nota þurrkaðan lagðan í bleyti)
  • 1 stk. grænt epli - saxað fínt eða rifið á rifjárni
  • 1 kg. risarækjur
  • 2 stk súraldin - safi og rifinn börkur notaður

Blandið öllu saman og kryddið með salti, hampolíu og súraldinsafa og berki. Látið marinerast á meðan þið græjar meðlætið.

Mynd/Allt úr engu

Anís ediksósa:

  • 1 msk. anísfræ
  • 1 msk. acacia hunang (það er líka hægt að nota venjulegt hunang)
  • 3 msk. eplaedik
  • 8 msk. hampolía
  • Saltverk salt

Hrærið saman hunang og edik í skál og pískið olíuna útí. Ristið anísfræin á pönnu við meðalhita þangað til þau brúnast örlítið, passið að þau brúnist ekki of mikið því þá verða þau bitur á bragðið. Hellið heitum fræjunum í sósuna og geymið til hliðar. Þessi ediksósa geymist við stofuhita endalaust lengi.

  • 1 agúrka - skorin í þynnur
  • 1 blaðlaukur - neðri hluti skorinn í skífur og efri hlutinn skilinn að í lög.

Grillið agúrkurnar og laukslögin á grillpönnu eða sem er enn betra á grilli þangað til þið fáið brenndar rendur á grænmetið og það eldað í gegn, þó ekki maukeldað. Geymið til hliðar, þið notið þetta ofan á rækjurnar á eftir.

Blaðlauksskífurnar steikið þið á þurri pönnu eða grillið þangað til þær eru eldaðar í gegn og bitur-sætar á bragðið. Bragðið til með eplaediki, hampolíu og salti og setjið út í rækjublönduna.

  • ½ stk. mangó - skorið í teninga
  • 2 stk. avcoadó skorið í teninga.
  • 100 gr. þangskegg AKA: truffluþari - saxaður gróflega

Geymið til hliðar, þessu er dreift yfir rækjublönduna þegar þið ert búin/n að steikja þær.

Hitið núna pönnu á hæsta hita svo það rjúki úr henni og steiktu rækjurnar ásamt öllu saxaða gotteríinu á funheitri pönnunni og steikið þar til rækjurnar eru 80% eldaðar.

Hellið rækjunum núna af pönnunni og á disk eða fat og dreifið truffluþaranum, mangóinu og avocadóinu yfir. Takið grilluðu blaðlauks- og agúrkuþynnurnar, rúllið þeim upp og látið þær standa fallega ofan á réttinum.

Að lokum puntið með jurtum úr fjörunni og hellið ediksósunni yfir.


Tengdar fréttir






Fleiri fréttir

Sjá meira


×