„Kröpp og dýpkandi“ lægð nálgast landið

Gular hríðarviðvaranir taka gildi í nokkrum landshlutum á morgun. „Kröpp og dýpkandi“ lægð nálgast landið, að því er segir í hugleiðingum veðurfræðings á vef Veðurstofu Íslands, og mun þá hvessa „hressilega“ að austan, síðar norðaustan, og fer að snjóa sunnan- og austanlands.

Í dag má búast við norðankalda og dálitlum éljum norðan til framan af degi en snýst svo í sunnanátt með lítilsháttar slyddu eða snjókomu sunnan- og vestanlands. Léttir til fyrir norðan og austan.

Gular viðvaranir taka svo gildi á Suðurlandi, Suðausturlandi og Austfjörðum síðdegis á morgun. Búast má við hríðarbyl, slæmu skyggni og vindi 15-25 m/s með hviðum allt að 40 m/s. Viðvaranirnar verða í gildi fram á kvöld.

„Fer þó smám saman hlýnandi og rignir við ströndina um kvöldið. Heldur hægari vindur úrkomuminna á vesturhelmingi landsins, en bætir vel í um kvöldið. Áfram stíf norðan- og norðaustanátt á fimmtudag með éljum víða á landinu, en bjartviðri syðra og kólnar heldur,“ segir í hugleiðingum veðurfræðings.

Veðurhorfur á landinu næstu daga

Á miðvikudag:

Vaxandi austan- og síðar norðaustanátt, 15-25 m/s eftir hádegi, hvassast við fjöll SA til. Víða snjókoma eða slydda, einkum á A-verðu landinu, en rigning við ströndina um kvöldið. Hlýnar í veðri og hiti 0 til 5 stig með kvöldinu.



Á fimmtudag:

Norðaustan 15-23 m/s norðvestanlands, en annars hægari. Snjókoma á norðanverðu landinu, en él syðra. Hiti kringum frostmark.



Á föstudag:

Stíf austlæg átt með snjókomu eða éljagangi. Vægt frost víða hvar.



Á laugardag:

Snýst í norðaustanátt með snjókomu víða um land, en léttir til SV-lands og kólnar í veðri.



Á sunnudag:

Líklega hæg vestlæg átt með éljum, einkum V-lands og frosti 1 til 6 stig.



Á mánudag:

Útlit fyrir stífa suðvestanátt með éljum, en bjartviðri N- og A-lands og köldu veðri.