Segja nýjan leiðtoga ISIS vera einn af stofnendum samtakanna

Íslamska ríkið hefur fundið nýjan leiðtoga. Sá heitir Amir Mohammed Abdul Rahman al-Mawli al Salbi og er einn af stofnmeðlimum hryðjuverkasamtakanna. Þetta hefur Guardian eftir heimildarmönnum sínum innan leyniþjónustusamfélags Bretlands. Salbi mun hafa verið gerður að leiðtoga samtakanna einungis klukkustundum eftir að Abu Bakr al-Baghdadi dó í árás bandarískra hermanna í október. Á þeim tíma var nafn nýs leiðtoga sagt vera Abu Ibrahim al-Hashimi al-Quaraishi, sem var dulnefni Salbi.

Síðan þá hafa vestrænar leyniþjónustur aflað frekari upplýsinga um Salbi og er hann sagður gerður úr svipuðu móti og Baghdadi. Hann fæddist í Tal Afar í Írak og er menntaður í íslömskum fræðum. Hann kynntist Baghdadi í fangelsi Bandaríkjahers í Írak árið 2004.

Áður en Baghdadi sprengdi sig í loft upp þegar hann var umkringdur af hermönnum, höfðu Bandaríkin sett fimm milljónir dala til höfuðs Salbi og annarra ISIS-liða sem þóttu líklegir til að taka við stjórnartaumunum ef Baghdadi yrði felldur.

Sjá einnig: Hvernig hermenn Bandaríkjanna duttu í „lukkupottinn“

Þá er Salbi sagður vera heilinn á bakvið ódæði ISIS-liða gagnvart Jasídum, sem Sameinuðu þjóðirnar segja vera þjóðarmorð.

Salbi er talinn hafa varið undanförnum mánuðum og vikum í að tryggja yfirráð sín yfir hryðjuverkasamtökunum. Þó yfirráðasvæði þeirra í Sýrlandi og Írak sé fallið er talið að þúsundir vígamanna séu enn í felum í ríkjunum og sömuleiðis hafa önnur hryðjuverkasamtök í Afríku og suðaustur Asíu lýst yfir hollustu við ISIS.

Ekki er vitað hvar hann er niðurkominn en talið er mögulegt að Salbi haldi til í Tyrklandi, þar sem bróðir hans er stjórnmálamaður.