Tónlist

Billi­e Eilish kom, sá og sigraði á Gram­my-verð­launa­há­tíðinni

Sunna Kristín Hilmarsdóttir skrifar
Billie Eilish var sigursæl á Grammy-verðlaununum í nótt.
Billie Eilish var sigursæl á Grammy-verðlaununum í nótt. vísir/getty

Bandaríska tónlistarkonan Billie Eilish, sem sló eftirminnilega í gegn á síðasta ári með fyrstu plötu sinni, When We All Fall Asleep, Where Do We Go, sópaði til sín öllum stærstu verðlaununum á Grammy-verðlaunahátíðinni sem fram fór í Los Angeles í gærkvöldi og nótt.

Alls vann Eilish til fimm verðlauna. Hún var valin besti nýliðinn og á lag ársins, Bad Guy, sem einnig var valin smáskífa ársins. Þá var plata hennar When We All Fall Asleep, Where Do We Go bæði valin plata ársins sem og poppplata ársins.

Þá hlaut eldri bróðir hennar og nánasti samstarfsmaður, Finneas O‘Connell, Grammy-verðlaun fyrir að framleiða fyrstu plötu systur sinnar.

Eilish, sem tilnefnd var til alls átta Grammy-verðlauna, er yngsti tónlistarmaðurinn til að hljóta verðlaunin fyrir plötu ársins.

„Ég grínast mikið með þessa hluti en ég vil í einlægni segja að ég er mjög þakklát,“ sagði Eilish í gærkvöldi.

Platan var öll tekin upp æskuheimili hennar og bróður hennar í Los Angeles. Sagði O‘Connell að þau hefðu gert það því hann væri mest skapandi þar sem honum liði hvað þægilegast.

„Það er ótrúlega mikill heiður að fá Grammy-verðlaunin fyrir að gera heimagerðar smákökur,“ sagði hann.

Eins og Vísir greindi frá í gærkvöldi vann íslenska tónskáldið Hildur Guðnadóttir Grammy-verðlaunin fyrir tónlist sína í sjónvarpsþáttunum Chernobyl.

Helstu sigurvegarar á Grammy-verðlaununum 2020:

Plata ársins: Billie Eilish, When We All Fall Asleep, Where Do We Go
Smáskífa ársins: Billie Eilish, Bad Guy
Lag ársins: Billie Eilish, Bad Guy
Nýliði ársins: Billie Eilihs, Bad Guy
Besta poppplatan – sungin: Billie Eilish, When We All Fall Asleep, Where Do We Go
Besti sóló-poppflytjandinn: Lizzo, Truth Hurts
Besta poppdúóið/poppsveitin: Lil Nas X og Billy Ray Cyrus, Old Town Road
Besta poppplatan – hefðbundin: Elvis Costello & The Impostors, Look Now
Besta raftónlistarplatan: The Chemical Brothers, No Geography
Besta rokkplatan: Cage the Elephant, Social Cues
Besta alternative-platan: Vampire Weekend, Father of the Bride
Besta R&B-platan: Anderson Paak, Ventura
Besta rappplatan: Tyler, the Creator, Igor
Besta kántríplatan: Tanya Tucker, While I‘m Livin‘



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.