Höskuldur skoraði degi eftir að bróðir hans lést: „Fótboltinn var okkar tenging“

Höskuldur Gunnlaugsson, leikmaður Breiðabliks, missti bróður sinn síðasta sumar. Hann var aðeins 28 ára þegar hann féll frá.

Höskuldur spilaði leik gegn ÍA á Akranesi daginn eftir að bróðir hans lést og skoraði í 1-2 sigri Breiðabliks. Markið má sjá hér fyrir neðan.

Höskuldur ræddi um bróðurmissinn í útvarpsþættinum Fótbolta.net á X977 á laugardaginn.

„Þetta er það erfiðasta sem maður hefur lent í og mesta áfallið. Maður er enn að vinna úr þessu,“ sagði Höskuldur.

Höskuldur segir að bróðir sinn hafi verið stærsta ástæðan fyrir því að hann byrjaði að æfa fótbolta.

„Mig langaði að spila fyrir hann og ég ákvað að fylgja innsæinu. Fótboltinn var okkar tenging. Ég fór í fótbolta út af honum. Við fórum saman út á sparkvöll og hann þjálfaði mig,“ sagði Höskuldur.

„Mér fannst voða gott að vinna í sorgarferlinu í gegnum fótboltann og heiðra minningu hans í gegnum þann hlut sem tengdi okkur mest; fótboltann. Þetta var mjög mikilvægt fyrir mig, fjölskyldu mína og alla sem þekktu hann, að skora þetta mark og tileinka honum það.“

Höskuldur ákvað að spila leikinn gegn ÍA þrátt fyrir áfallið daginn áður.

„Mig langaði svo að gera það um nóttina þegar ég hugsaði hvort ég ætti að spila leikinn eða ekki. Maður var í sjokk ástandi en mér fannst ég eiga að spila leikinn,“ sagði Höskuldur.

„Mörgum fannst þetta skrítið. Ég svaf ekkert um nóttina, borðaði ekkert og það var ekki áskjósanlegt að spila fótboltaleik. En mig langaði svakalega að spila fyrir hann og fjölskylduna. Mér fannst það gott og það var styrkur fyrir fjölskylduna. Þetta er dýrmæt minning.“

Höskuldur var lánaður til Breiðabliks frá Halmstad síðasta vor. Hann skoraði sjö mörk í 20 leikjum í Pepsi Max-deild karla í fyrra og sex mörk í fjórum bikarleikjum. Höskuldur hefur alls leikið 88 leiki fyrir Blika í efstu deild og skorað 18 mörk.

Höskuldur er í íslenska A-landsliðinu sem mætir El Salvador og Kanada í tveimur vináttulandsleikjum í þessari viku.

Viðtalið við Höskuld má hlusta á hér fyrir neðan.