Innlent

„Þetta eru bara dauðir hlutir og stelpan bjargaðist“

Jóhann K. Jóhannsson og Samúel Karl Ólason skrifa
Magnús Einar Magnússon, formaður Sæbjargar á Flateyri.
Magnús Einar Magnússon, formaður Sæbjargar á Flateyri. Vísir/Egill

„Maður heyrir að þetta er ónáttúrulegt hljóð. Maður er ekki vanur þessu hljóði sem kemur þarna,“ segir Magnús Einar Magnússon, formaður Sæbjargar á Flateyri, um það hvernig hann varð var við fyrra snjóflóðið í vikunni. Magnús var kominn upp í rúm og að reyna að sofna þegar hann heyrði umrætt hljóð fyrst.

„Þetta kemur svona eins og tveir stórir hvellir og lygna inn á milli,“ segir Magnús. Hann segir eiginkonu sína hafa áttað sig strax á að um snjóflóð hafi verið að ræða. Um leið og hún sagði það skall höggbylgjan frá flóðinu á húsi þeirra.

Meðlimir björgunarsveitarinnar voru kallaðir út vegna skaðans í höfninni og voru að gera sig klára og svo til gott sem tilbúnir þegar seinna snjóflóðið varð. Þá var Magnús sjálfur kominn á snjósleða þegar kona sem býr til móts við húsið sem varð fyrir snjóflóðinu hafði samband við þá.

„Það er í mesta lagi mínúta frá því við fáum meldingu um það og erum farnir upp eftir. Komnir á svæðið,“ segir Magnús.

Hann sagðist stressaður þegar hann sá ástandið á höfninni en það hafi gleymst um leið og seinna kallið kom.

„Þetta eru dauðir hlutir og það var allur okkar forgangur settur upp eftir.“

Garðurinn sannaði sig

Aðspurður um umræðuna um varnargarðinn og það hvort þau hafi búið við falskt öryggi segist Magnús telja það eðlilega hugsun, til að byrja með.

„En eins og ég reyni að hugsa þetta. Á sama tíma og hann klikkaði, þá sannaði hann sig all svakalega líka. Við værum ekkert að tala hérna saman í dag ef hann hefði klikkað allsvakalega hinu megin.“

Magnús var á Flateyri þegar snjóflóðið lenti á Flateyri 1995 en þá var hann sex ára gamall. Eina minning hans frá því var að vakna við hljóðið. Hann segir sömu upplifun núna staðfesta að hann hafi ekki búið þessa minningu til.

Þá segist Magnús finna fyrir miklum samhug hjá þjóðinni. Fólk víða að hafi boðið fram aðstoð sína.

Magnús segist hafa loks náð góðum svefni síðustu nótt en hann hafi verið orðið verulega þreyttur. Honum hafi fundist hann þurfa að vera á staðnum en sérhæfðir menn að sunnan sem hafi komið til að aðstoða hafi í raun skipað honum að fara að sofa.

Enn sem komið er segist Magnús ekki vera farinn að hugsa um framtíðinni og telur að það gerist þegar hversdagsleikinn skelli á aftur.

„Ég veit að það er búið að semja við fyrirtæki um að hreinsa höfnina, sem vonandi gengur vel. Þegar maður horfir hér yfir veit maður ekki alveg. Þetta er gífurlegt verkefni en það sem við sjáum ekki er hellingur. Það eru allavega þrír gámar hérna á kafi,“ segir Magnús.

Einn gámur er fullur af kajökum og annar af búnaði sjóstangveiðifyrirtækis. Um mikið tjón sé að ræða.

„En eins og ég hef sagt í mörgum viðtölum. Þetta eru bara dauðir hlutir og stelpan bjargaðist. Það er það eina sem skiptir okkur máli.“


Tengdar fréttir

Missti með­vitund í snjónum og man eftir sér á sjúkra­börunum

Alma Sóley Ericsdóttir Wolf, fjórtán ára stúlka sem bjargað var úr snjóflóði sem féll á Flateyri á þriðjudagskvöld, segist hafa verið að kveðja vinkonu sína í netspjalli og fara að halla sér þegar hún heyrði drunur. Þremur sekúndum síðar var hún föst í snjó.

Kisurnar í Ólafstúni 14 heilar á húfi

Eyþór Jóvinsson, íbúi á Flateyri og eigandi bókabúðarinnar í bænum, birti fallega mynd af sér á Facebook-síðu bókabúðarinnar í dag þar sem hann heldur á öðrum heimiliskettinum í Ólafstúni 14 sem varð fyrir snjóflóðinu sem féll á þriðjudagskvöld.

Flateyrarvegur opnaður

Tekin hefur verið ákvörðun um að opna Flateyrarveg, eftir veðurofsa og hamfarir síðustu daga.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.