Innlent

Setti traust sitt á Capacent enda blautur á bak við eyrun í opinberum ráðningum

Berghildur Erla Bernharðsdóttir og Kolbeinn Tumi Daðason skrifa

Ari Trausti Guðmundsson, formaður Þingvallanefndar, segir það auðvitað þannig að nefndin beri ábyrgð á því að umsækjandi um stöðu þjóðgarðsvarðar fékk 20 milljóna króna bótagreiðslu frá ríkinu. Ábyrgðinni sé engu að síður deilt enda hafi nefndin stuðst við ráðgjafafyrirtækið Capacent.

Þetta kom fram í máli Ara Trausta að loknum fundi Þingvallanefndar eftir hádegið í dag. Nefndin flýtti fundi sínum um tvær vikur vegna umfjöllunar um 20 milljóna króna bætur sem íslenska ríkið féllst á að greiða Ólínu Þorvarðardóttur eftir að kærunefndarnefnd jafnréttismála komst að þeirri niðurstöðu að nefndin hefði brotið á henni í störfum sínum.

Sagði sig úr nefndinni

Þingvallanefnd auglýsti starf þjóðgarðsvarðar á Þingvöllum laust til umsóknar haustið 2018. Af tuttugu umsækjendum þóttu tveir þeirra hæfastir til þess að gegna stöðunni. Annars vegar Einar Á. E. Sæmundsen sem ráðinn var þjóðgarðsvörður og Ólína Kjerúlf Þorvarðardóttir, þjóðfræðingur og fyrrverandi alþingismaður.

Oddný sagði sig úr Þingvallanefndinni vegna málsins á sínum tíma. Hún segir afgreiðsluna hafa einkennst af fúski.visir/vilhelm

Ósætti varð innan Þingvallanefndar með skipan Einars í stöðuna á sínum tíma og sagði Oddný G. Harðardóttir, sig úr nefndinni vegna málsins.

Niðurstöðuna kærði Ólína til kærunefndar jafnréttismála sem komst að þeirri niðurstöðu í fyrra vor, að Þingvallanefnd hefði brotið jafnréttislög með því að ráða Einar fram yfir hana í stöðuna. Fyrir jól náði svo ríkislögmaður og Ólína sáttum um bótagreiðslu vegna málsins.

Minnihlutinn gleymdi sér líka

Þingvallanefnd sendi frá sér yfirlýsingu í kjölfar niðurstöðu kærunefndar í apríl og vísaði í raun bara í hana aftur í tilkynningu að loknum fundi nefndarinnar í dag. Þar kom fram að meirihlutinn harmaði hvernig til tókst við huglægan þátt mats við ráðningu þjóðgarðsvarðar og skráningu þess þáttar. Bent er á að ráðningarferlið hafi verið í umsjón Capacent en meirihlutinn uni þó úrskurðinum.

Guðmundur Andri Thorsson, þingmaður Samfylkingarinnar, og Hanna Katrín Friðriksson, þingmaður Viðreisnar, voru sammála að una niðurstöðunni en gerðu þó athugasemdir:

„Í ráðningarferlinu mótmæltu fulltrúar minni hlutans þeirri afstöðu meiri hluta nefndarinnar að fullnægjandi mat hefði verið lagt á huglæga matsþætti með viðtölum og úrlausn raunhæfs verkefnis. Taldi minni hlutinn að matið hafi verið óraunhæft af hálfu meiri hlutans, m.a. vegna þess að einn fulltrúinn mætti ekki á kynningu á raunhæfu verkefnunum og var ekki heldur einn af þeim sem tók viðtölin við umsækjendur, en tók samt sem áður þátt í mati á frammistöðu umsækjenda,“ segir í athugsemdi Guðmundar Andra og Hönnu Katrínar.

Páll Magnússon, þingmaður Sjálfstæðisflokksins og fyrrverandi útvarpsstjóri.Vísir/Vilhelm

Vísa þau til þess að Páll Magnússon, þingmaður Sjálfstæðisflokksins, hafi ekki verið viðstaddur kynningu Ólínu auk þess að taka ekki viðtölin við umsækjendur.

„Þá gerði minni hluti nefndarinnar einnig athugasemdir við þau vinnubrögð að leita ekki eftir umsögnum umsagnaraðila og skrá ekki niður mat á frammistöðu umsækjenda. Nefndarmenn bera hins vegar ábyrgð á því að hafa ekki bókað um þau samskipti í fundargerðabók nefndarinnar.“

Afar persónulegt mál

Ari Trausti minnir á að um mjög persónulegt mál sé að ræða. Huglæga matið, sem hafi vissulega verið lagt mat á en gleymst að skrá, snúist um mannlega þáttinn. Litlu hafi munað á Einari og Ólínu í hlutlæga þættinum, þó Einar hafi skorað örlítið hærra.

Hvað huglæga matið varði hafi verið mikill munur á þeim Einari og Ólínu frá hans bæjardyrum séð.

Ólína sótti 20 milljónir króna frá ríkinu og telur sig hafa getað fengið hærri upphæð hefði málið farið fyrir dóm.Vísir/Vilhelm

„Nú verður þú að átta þig á að þarna er kominn meiri og minnihluti. Þetta er það persónulegt. Þarna er fólk sem hefur unnið með Ólínu, ekki hef ég unnið með henni. Þú horfir til ferils, hvernig þau komu fram á þessumm fundum. Hvernig þau leggja sína áherslu á það sem þingvallarþjóðgarður á að gera.“

Hann er harður á því að rétti maðurinn hafi verið ráðinn í starfið.

„Að mínu mati persónulgea skoraði Einar mun hærra en Ólína enda réðum við hann. Ég tel enn að við höfum ráðið hæfasta manninn.“

Ætlar ekki að hætta sér út á hálan ís

Páll Magnússon hefur sagt að tilefni geti verið til þess að sækja bætur til Capacent vegna ráðningar.

„Nú ætla ég ekki að hætta mér út á hálan ís. Ég skil alveg röksemd Páls en að ég fari að fella dóm hvort það sé rétt eða rangt, ínáanlegt eða ekki, það ætla ég ekki að gera. Þetta mál er í hendi ríkislögmanns,“ segir Ari Trausti.

Það sé hins vegar svo að hann hafi treyst hinum ráðna ráðgjafa, sem viðstaddur var allt ferlið, til þess að gera hlutina rétt.

Öxará á Þingvöllum í klakaböndum.visir/vilhelm

„Að hann hefði vit fyrir mér. Ég hef aldrei staðið í ráðningu opinbers starfsmanns.“

Varðandi það hvort hann eigi að sæta ábyrgð sem nefndarformaður segir Ari Trausti að hann hafi skoðað það í apríl. Engin krafa hafi verið um það þá auk þess sem að hvorki lögmaður nefndarinnar né þingflokksformaður VG hafi talið ástæðu til þess.

Þá beri hann enga ábyrgð á upphæðinni sem Ólína fékk greidda. Það hafi verið ríkislögmanns að semja um það.

„Það hefði engu máli skipt hvort þau hefðu samið um eina milljón eða tuttugu. Ég ber enga ábyrgð á þessum gjörningi þarna. Hann er alfarið á ábyrgð Ólínu og ríkislögmanns.“


Tengdar fréttir

Ólína fær 20 milljónir í bætur frá íslenska ríkinu

Ríkislögmaður hefur komist að samkomulagi við Ólínu Kjerúlf Þorvarðardóttur um greiðslu bóta þegar sem gengið var framhjá henni við ráðningu í stöðu þjóðgarðsvarðar á Þingvöllum. Bótaafjárhæðin nemur 20 milljónum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.