Atvinnulíf

Hrika­lega gamal­dags í skipu­lagi og í fjar­fundar­hug­leiðslu með Guðna

Rakel Sveinsdóttir skrifar
Einar Bárðarson.
Einar Bárðarson. Vísir/Vilhelm

Það þekkja flestir Einar Bárðason úr fjölmiðlum eða sem landsþekktan plokkara enda viðurkennir hann að með árunum verður það alltaf erfiðara og erfiðara að vera meðvirkur sóðaskap í umhverfinu. Einar byrjar daginn á því að læði-ast fram úr á morgnana og fær sér stórt vatnsglas en hann starfar í dag sem framkvæmdastjóri Votlendissjóðs.

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefni.

Hvenær vaknar þú á morgnana?

„Ég er lang oftast vaknaður um sjö leytið, oftast svona kortér í sjö.“

Hvað er það fyrsta sem þú gerir á morgnana?

„Ég læðist fram og fæ mér stórt vatnsglas og læt það ræsa kerfið eftir nóttina.

Núna síðustu mánuði hef ég byrja ég þriðjudaga og fimmtudaga með hugleiðslu undir stjórn Guðna Gunnarssonar í gegnum fjarfundar búnað eða facebook live. 

Þetta finnst mér alveg ótrúlega góð byrjun á deginum. Guðni beinir manni í rétta slóð inn í daginn. Síðan læt ég renna í einn sterkan kaffibolla og skoða blöðin og. aðra miðla og leita af góðum fréttum.“

Er plokk ávanabindandi?

„Plokk er kannski ekki ávanabindandi en virðing fyrir náttúrunni og væntumþykja er mér bara í blóð borin og með árunum á maður erfiðara og erfiðara með það að humma fram af sér eða leyfa sér að vera meðvirkur með sóðaskap.

En talandi um hugleiðslu og núvitund þá segir Guðni vinur minn og leiðbeinandi að uppþvottaburstinn og uppvaskið séu hans uppáhalds núvitundar tæki en fyrir mig er það plokkarinn og ruslapokinn.“

Einar segir plokkið vera sína núvitund.Vísir/Vilhelm

Í hvaða verkefni ertu að vinna helst í þessa dagana?

„Núna er miklar annir í vinnunni hjá mér við erum að undirbúa endurheimt votlendis um allt land. Því miður var síðast liðinn vetur svo snjóþungur að við gátum ekki komist í eins mikið og við vildum í vor. Það má segja að veturinn og snjórinn í skurðunum hafi runnið saman við varptímann en honum líkur núna í lok júlí og byrjun ágúst og þá ætlum við að láta hendur standa fram úr ermum.

Vinnan fest helst í því þessa daganna að senda inn tilkynningar til sveitarfélaga, ganga frá samningum ýmiskonar og vinna með verktökum að verkáætlunum og tímasetningum. Gríðarlega spennandi og gefandi starf. Einn helsti samstarfsaðili okkar í þessari vinnu er Landgræðslan og sérfræðingar hennar.

Í fyrra komust við á gott skrið og endurheimtum 73 hektara sem er stöðvun losunar CO2 ígilda uppá 1460 tonnum árlega samkvæmt meðaltali Loftlagsráðs sameinuðu þjóðanna. 

Landgræðslan vann eitthvað álíka þannig að við erum komin á gott skrið. Í ár eru væntingar okkar að fara í nokkuð hundruð hektara.

Þetta er ekki bara öflugasta og fljótasta leiðinn í baráttunni við loftslagsbreytingarnar heldur magnast náttúrulegur fjölbreytileiki og vatnsgæði svæða sem hafa verið endurheimt til muna.“

Hvernig skipuleggur þú þig í vinnu?

„Ég er með hrikalega gamaldags kerfi í skipulaginu. Það er sama hvað ég læri eða hala niður af forritum og græjum. Þetta endar alltaf á tossalistum sem fylgja mér í Apple tækjunum mínum. Einfalt Notes kerfi sem ég hleð verkefnum dagsins og vikunnar á og þau fara ekki af listanum fyrr en þeim er lokið. 

Stundum gríp ég í Mindmap eða mind manager þegar ég er að implimenta eitthvað með stærri hóp en grunnkerfið er alltaf gamli tossinn.“

Hvenær ferðu að sofa á kvöldin? 

„Ég reyni að vera kominn í náttgallann uppúr tíu, horfi á seinni fréttatímann ef sá gállinn er á mér annars finn ég mér eitthvað léttmeti til að fylgja mér inn í draumaheiminn. Góður svefn og góðar svefnvenjur eru það besta sem maður getur gefið sjálfum sér. Með hausinn hvíldan og tilbúinn í dagsins önn á hverjum degi þá er maður klár í hvað sem er.“


Tengdar fréttir





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×