Sara braut glerskál á hausnum sínum og Anníe Mist mundaði riffil

Það er ekki auðvelt að vera atvinnumaður í íþrótt sem lifir á jafnmiklum óvissutímum og CrossFit gerir þessa dagana. Hvort nýjustu Instagram færslur tveggja af stærstu CrossFit stjörnum Íslands sé tákn um það er erfitt að segja en þær skera sig að minnsta kosti úr flestum færslum þeirra beggja hingað til.

Ekkert er í raun vitað um framtíðina í CrossFit íþróttinni og hún gæti jafnvel þurft að skipta um nafn til að lifa. Heimur yfirstjórnar CrossFit verður alltaf ljótari og ljótari eftir því sem meira kemur fram í dagsljósið. Það er krafa um stórar breytingar en lítið gerist á meðan Greg Glassman á íþróttina einn.

Heimsleikarnir í CrossFit 2020 eru líka í uppnámi eftir því sem fleiri og fleiri útiloka það að taka þátt. Katrín Tanja var ein af þeim fyrstu en alls hafa sextán gefið það út að þeir verði ekki með á heimsleikunum í ár.

Íslensku CrossFit-stjörnurnar eru kannski miklu lengra í burtu frá því sem er að gerast en sem dæmi Katrín Tanja Davíðsdóttir sem hefur tekið slaginn af fullum krafti í Bandaríkjunum.

Anníe Mist Þórisdóttir hefur stutt vel við bakið á vinkonu sinni en Katrín Tanja hefur viðurkennt að síðustu vikur hafi tekið mjög á hana.

Katrín Tanja fagnaði líka óvenjulegri leið samlöndu sinnar Söru Sigmundsdóttur til að tjá sig um ástandið á Instagram.

Sara setti inn mjög sérstakt myndband af sér þar sem hún drekkur úr glerskál og brýtur hana síðan á höfðinu á sér. Sara skrifaði síðan við myndbandið: „Ég að reyna átta mig á öllu því sem er í gangi núna.“

Það er nokkuð ljóst að þetta er tilvísun í ástandið í CrossFit heiminum og jafnvel nýjustu fréttir af meðferð kvenna hjá CrossFit.

Katrín Tanja tekur því þannig og skrifar við færslu Söru: „Takk og amen. hahahahaha.“ Það má sjá færslu Söru hér fyrir neðan.

Anníe Mist Þórisdóttir ákvað aftur á móti að endurgera mynd frá því fyrir ári síðan þegar hún keppti með loftriffil á Rogue Invitational mótinu.

Anníe Mist tók nýja mynd af sér og setti við hliðina en eins og allir vita þá er hún komin meira en sjö mánuði á leið með dóttur sína.

Bumban stelur auðvitað senunni en það er líka óvenjulegt að sjá CrossFit stjörnu með slíkan riffil í keppni. Rogue Invitational mótið hefur verið tilbúið að brydda upp á nýjungum og þetta var dæmi um það.

Heimsmeistarinn Tia-Clari Toomey er meðal þeirra sem kemur með athugasemd við myndina hjá Anníe Mist og hún skrifaði undir: „Þetta er magnað.“

Það verður samt að segja að þessi færsla Anníe Mist er að allt öðrum toga en við erum vön enda mun agressífari en flestar hinar. Færslu Anníe Mistar má sjá hér fyrir neðan.