Skoðun

Það er kominn tími á endur­ræsingu ferða­þjónustunnar, út­gáfa 2.0

Ásta Kristín Sigurjónsdóttir skrifar

Fyrir lok mars setti Íslenski ferðaklasinn niður tillögu að áætlun um hvernig væri hægt að standa að endurræsingu ferðaþjónustunnar / Restart Tourism á grunni sjálfbærni, nýsköpunar og tækni. Áætlunin gekk alla tíð út á að tengja við helstu markmið nýrrar stefnu ferðaþjónustunnar um að vera leiðandi í sjálfbærri þróun. Tímasetningin var vissulega í miðjum stormi þar sem við vissum ennþá lítið um framhaldið en við vissum þó að við þyrftum sterk og burðug fyrirtæki til að standa vaktina þegar að ástandinu lyki. Lykilatriðið var líka að hugsa nokkur skref fram í tímann og halda þannig mikilvægu samkeppnisforskoti áfangastaðarins og þeirri staðreynd að með skapandi lausnum og hugmyndum hefur okkur farnast að gera ótrúlega stóra og merkilega hluti með litlum aðföngum. Mikilvægi verkefnisins felst fyrst og fremst í að verja mikilvægan árangur fyrir íslenskt efnahagslíf en á árinu 2019 stóð ferðaþjónusta undir 40% af útflutningstekjum þjóðarinnar og skapaði yfir 25þúsund störf um allt land. Að standa í því að verja mikilvægi þess að þurfa að verja atvinnugreinina og uppbyggingu hennar er með ólíkindum en um það snýst þessi pistill ekki.

Hugmyndinni að Ferðaþjónustu 2.0 – Endurræsingu, var ágætlega tekið og við hvött áfram en þeir opinberu aðilar sem við kynntum verkefnið fyrir voru ekki komin á þennan stað á þeim tíma að stokkið væri af stað í að útfæra hugmyndirnar eða fjármagna þær með einhverjum hætti. Það hefði vissulega verið dálítið geggjað að vera fyrst til að opinberlega setja fram áætlun um endurræsingu og það undir hatti Restart Tourism á heimsvísu. Í dag, 4.júní tilkynnti UNTWO um aðgerðaráætlun undir heitinu: Restarting Tourism. Gott og vel, við styðjum það heilshugar og klöppum okkur bara nokkuð stolt á bakið fyrir að hafa verið í nákvæmlega sama hugsanagangi fyrir tveimur mánuðum síðan.

Nýkjörin stjórn Íslenska ferðaklasans. Elín Árnadóttir Isavia, Rannveig Grétarsdóttir Eldingu, Sævar Skaptason Hey Iceland, Ásta Kristín Sigurjónsdóttir framkvæmdastjóri Íslenska ferðaklasans, Sölvi Sturluson Íslandsbanka, Árni Gunnarsson Iceland Travel og Þóra Eggertsdóttir frá Air Iceland Connect. Á myndina vantar Helgu Árnadóttur Bláa lóninu og Helga Jóhannesson Landsvirkjun, ásamt Dóru Gunnarsdóttur og Þorsteini Hjaltasyni frá Landsbankanum.Íslenski ferðaklasinn

Reyndar er það svo að við ákváðum að bíða ekki samþykkis eða fleiri stuðningsmanna við verkefnið heldur keyrðum það fullum fetum af stað innan okkar raða. Við gáfum út þrjár upptökur af samtölum við sérfræðinga út um allan heim um stöðuna, settum af stað vinnustofur og héldum stafræna ráðstefnu um tækni í ferðaþjónustu sem náði til yfir 1.000 þátttakenda frá yfir 10.löndum. Endurræsum ferðaþjónustu 2.0 / Restart Toursim er því komið á fullt skrið og munum við nota þetta verkefnaheiti sem regnhlíf fyrir verkefni Ferðaklasans sem tengjast sjálfbærni, nýsköpun og tækni. Við vilum vinna fyrir og með ferðaþjónustu um allt land sem hefur metnað til að stunda ábyrga ferðaþjónustu en við viljum líka koma að því að styðja fyrirtækin uppúr þeim erfiðu hjólförum sem þau eru eðli málsins samkvæmt sum föst í. Til þess þurfum við umboð og samstarfsvilja breiðs hóps.

Aðalfundur Íslenska ferðaklasans fór fram þann 4.júní þar gerðu klasaaðilar upp síðastliðið starfsár sem var það allra viðamesta frá stofnun klasans árið 2015. Verkefnin eru ærin framundan og aldrei verið eins mikilvægt að ólíkir aðilar innan virðiskeðju ferðaþjónustunnar komi saman og efli hvort annað á alla vegu. Stórar ákvarðanir voru teknar og sumar erfiðar, m.a sú að segja okkur frá leigusamningi um Hús ferðaklasans að Fiskislóð 10, það verkefni var sett af stað með Íslenska sjávarklasanum í upphafi árs 2018 en Íslenski ferðaklasinn tók alfarið við rekstri árið 2019. Nú er svo komið að viðskiptamódel hússins stendur ekki undir sér og betra að setja punktinn hér en að halda áfram inní óvissuna. Húsið hefur ekki aðeins verið vettvangur fyrirtækja af öllum stærðum og gerðum sem nýtt hafa sér sameiginlega vinnuaðstöðu heldur einnig miðstöð fræðslu, viðburða og tengsla milli aðila í greininni. Tímamótum fylgja vissulega ný tækifæri og er Íslenski ferðaklasinn hvergi banginn við að grípa þau, nú sem fyrr.

Nýtum sumarið til að upplifa ferðaþjónustu sem á sér enga líka, njótið náttúrunnar og þeirrar yfirburða þjónustu og upplifunar sem íslenskir ferðaþjónustuaðilar eru rómaðir fyrir um allan heim.

Komdu með - hittumst á ferðinni!

Höfundur er framkvæmdastjóri Íslenska ferðaklasans.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Skoðun

Skoðun

Fylgir þú lögum?

Ugla Stefaníu Kristjönudóttir Jónsdóttir,Þorbjörg Þorvaldsdóttir skrifar

Skoðun

Ótti

Gunnar Dan Wiium skrifar

Sjá meira


Velkomin á Vísi. Þessi vefur notar vafrakökur. Sjá nánar.