Körfubolti

Búið að staðfesta breytt fyrirkomulag NBA | 22 lið mæta til leiks í Disney World

Runólfur Trausti Þórhallsson skrifar
Þessar fjórar ofurstjörnur NBA-deildarinnar (Paul George, Anthony Davis, Kawhi Leonard og LeBron James) eru allar á leiðinni í Disney World saman.
Þessar fjórar ofurstjörnur NBA-deildarinnar (Paul George, Anthony Davis, Kawhi Leonard og LeBron James) eru allar á leiðinni í Disney World saman. Brian Rothmuller/Getty Images

Í gærkvöld samþykktu forráðamenn allra liða í NBA-deildinni í körfubolta, nema eitt, breytt fyrirkomulag deildarinnar. Munu 22 lið mæta til leiks í Disney World í Orlando til að skera úr um hvaða 16 lið komast í úrslitakeppnina.

Af þeim 30 liðum sem kusu þá voru það aðeins Portland Trail Blazers á móti tillögunni.

Adrian Wojnarowski, líklega best tengdi blaðamaður heims þegar kemur að NBA deildinni, greindi frá.

„Samþykki stjórnarinnar er mikilvægt skref í átt þess að geta haldið áfram með tímabilið. Þó miklar hindranir séu til staðar vegna COVID-19 þá erum við bjartsýn á að klára tímabilið á öruggan og ábyrgan hátt í samráði við heilbrigðisyfirvöld,“ sagði Adam Silver, framkvæmdastjóri deildarinnar eftir að ljóst var að forráðamenn liðanna höfðu samþykkt tillöguna.

Verða liðin skimuð daglega fyrir kórónuveirunni og þó svo að liðin fái að fara í golf eða út að borða munu þau þurfa að virða fjöldatakmarkanir og virða tveggja metra regluna frægu. 

Ef leikmaður greinist með veiruna mun hann fara í sóttkví og svo lengi sem enginn annar í liðinu sé smitaður mun liðið halda áfram að spila samkvæmt áætlun. Samkvæmt nýju áætlun deildarinnar munu þrettán lið úr Vesturdeildinni og níu úr Austurdeildinni leika átta leiki hvert til að ákvarða hvar liðin enda í hvorri deild fyrir sig. 

Öll sextán liðin sem eru nú þegar í sæti sem gefur þátttökurétt í úrslitakeppninni – átta í hvorri deild – mæta til leiks í Disney World ásamt þeim sex liðum sem eru innan við sex sigurleikjum frá sæti í úrslitakeppninni. Það eru New Orleans Pelicans, Portland Trail Blazers, San Antonio Spurs, Sacramento Kings, Phoenix Suns og Washington Wizards.

Fari það svo að liðið sem endar í 9. sæti í sinni deild sé aðeins fjórum sigurleikjum frá 8. sætinu og þar með sæti í úrslitakeppni þá mætast þau innbyrðis til að skera úr um hvort fer í úrslitakeppnina. 

Liðið í 9. sæti þyrfti að vinna tvo leiki af tveimur á meðan liðinu í 8. sæti dugir einn sigur.

Samkvæmt heimildum ESPN munu liðini byrja að æfa í Orlando þann 9. júlí næstkomandi. Þá munu allir leikir sem og æfingar fara fram í Disney World. Þann 12. október er svo áætlað að deildinni verði lokið.

Alls verður spilað á þremur völlum en fjórir klukkutímar verða á milli leikja. Reiknað með því að hvert lið þurfi að spila allavega einu sinni bak í bak, það er tvo leiki á tveimur dögum, á meðan deildarkeppnin er kláruð.

Þá verður úrslitaviðureign deildarinnar leikin annan hvern dag en lið þurfa enn að vinna fjóra leiki til að tryggja sér sigur.

Einnig eru komnar dagsetningar á þá ýmsu viðburði sem fylgja NBA ár hvert. Nýliðalottó deildarinnar fer fram 25. ágúst og nýliðavalið sjálft þann 15. október. Samningslausir leikmenn mega semja við ný lið 18. október og að lokum er stefnt að því að hefja næsta tímabil þann 1. desember.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.