Innlent

Stórt verkefni flugvirkja að vernda flugflota Icelandair

Kristján Már Unnarsson skrifar
Flugvirkjar setja tæringarvörn inn á eldsneytiskerfi þotuhreyfils í flugskýli Icelandair á Keflavíkurflugvelli í dag.
Flugvirkjar setja tæringarvörn inn á eldsneytiskerfi þotuhreyfils í flugskýli Icelandair á Keflavíkurflugvelli í dag. Stöð 2/Arnar Halldórsson.

Meirihluti flugvirkja Icelandair sinnir nú sérhæfðu geymsluverkefni, sem er að verja kyrrsettar flugvélar skemmdum svo þær verði klárar til flugs á ný um leið og þörf verður fyrir þær. Frá þessu var greint í fréttum Stöðvar 2.

Flugvélar eru smíðaðar til að fljúga en ekki til að standa kyrrar á jörðinni vikum og mánuðum saman. Af um þrjátíu þotum Icelandair eru aðeins þrjár þessa dagana að fljúga með farþega. Hinum farþegaþotunum er búið að pakka inn í geymsluumbúðir meðan fraktvélarnar hafa næg verkefni.

Snúrur og slöngur, sem við sjáum liggja upp í hreyflana á útistæðum, eru liður í því að tryggja varðveislu flugvélanna. Jens Þórðarson, framkvæmdastjóri flugrekstrarsviðs Icelandair, segir það heljarinnar verkefni.

Jens Þórðarson, framkvæmdastjóri flugrekstrarsviðs Icelandair.Stöð 2/Arnar Halldórsson.

„Já, þetta er mjög stórt verkefni og hver einasta flugvél þarf töluverða athygli, bæði til að koma henni í geymslu og svo til að viðhalda henni meðan á geymslu stendur,“ segir Jens.

Sumar þoturnar eru í skammtímageymslu og aðrar í langtímageymslu, eins og sú sem við sáum inni í flugskýli en þar voru flugvirkjar að setja tæringarvörn á eldsneytiskerfi hreyfilsins. Síðan var flugskýlið opnað því ræsa átti hreyfilinn.

„Það eru sum verk sem þarf að vinna á þriggja daga fresti, önnur á sjö daga fresti, sum á tveggja vikna fresti, og allt upp í sum á mánaðarfresti, sem þarf þá að eiga sér stað allan tímann. Þannig að það er nóg að gera hjá fólkinu hérna bara við það að halda utan um þær vélar sem eru í geymslu hér á vellinum,“ segir Jens.

Búið er að breiða yfir framrúður og hreyfilop þeirra flugvéla Icelandair sem standa óhreyfðar á Keflavíkurflugvelli og sæta geymslumeðferð.Stöð 2/Arnar Halldórsson.

Þetta er raunar aðalverkefni meirihluta flugvirkjanna þessa dagana; að sjá til þess að vélarnar haldist flughæfar og skemmist ekki. Besti geymslustaðurinn fyrir þær væri samt þurr eyðimörk, særokið á Miðnesheiði er því áskorun.

„Þetta snýst líka mikið um það bara hreinlega að þvo vélarnar, þrífa af þeim reglulega.“

Svo er límt fyrir alla opnanlega fleti.

„Það er einfaldlega til að reyna að tryggja að það sé eðlilegt rakastig í vélinni, vegna þess að raki er mikill óvinur flugvéla.“

Jens segir að nú komi sér vel að hafa stór og góð flugskýli.

„Það eru gríðarlega mikilvægir innviðir fyrir Icelandair að eiga svona aðstöðu, og eiga þessa þekkingu, til þess að vera tilbúin í þann rekstur sem félagið þarf á að halda um leið og kallið kemur,“ segir framkvæmdastjóri flugrekstrarsviðs Icelandair.

Hér má sjá frétt Stöðvar 2:


Tengdar fréttir

Icelandair stefnir á að hefja flug 15. júní

„Við stefnum á að komast á flug upp úr 15. júní og ná sem fyrst að komast í daglega tíðni til okkar helstu áfangastaða til að byrja með og svo auðvitað fylgjumst við eins og allir aðrir með tilkynningum frá okkar nágrannalöndum um hvenær þau opna,“ segir Birna Ósk Einarsdóttir, framkvæmdastjóri sölu- og þjónustusviðs Icelandair.

Samningsstaða Icelandair gagnvart Boeing styrkist

Kyrrsetning Boeing Max flugvélanna setti áætlanir Icelandair úr skorðum en félagið á enn eftir að fá tíu af sextán flugvélum sem það pantaði afhentar. Forstjórinn segir samningsstöðu Icelandair gagnvar Boeing styrkjast eftir því sem það dragist að koma flugvélunum í umferð.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.