Tveir með dólgslæti handteknir á bráðamóttökunni

Tveir karlmenn í mjög annarlegu ástandi voru handteknir í tveimur aðskildum málum í og við bráðamóttökuna í Fossvogi í nótt. Mennirnir voru með óspektir og hlýddu ekki ítrekuðum fyrirmælum lögreglu um að yfirgefa svæðið, samkvæmt dagbók Lögreglunnar á höfuðborgarsvæðinu.

Ráðist var á umsjónarmann skíðasvæðis Grafarvogs um klukkan sjö í gær. Það gerðist þegar umsjónarmaðurinn gerði athugasemd við að nokkrir unglingspiltar færu ekki eftir reglum skíðasvæðisins. Réðust þeir þá á hann með höggum og spörkum.

Sjá einnig: Veittust að starfs­manni skíða­svæðisins í Grafar­vogi

Þeir voru farnir þegar lögregluþjóna bar að garði.

Skömmu síðar var tilkynnt um nokkra drengi sem brutu rúðu á sundstað í austurborginni. Það atvik náðist hugsanlega á upptöku.

Þá var tilkynnt um þjófnað á veski viðskiptavinar í matvöruverslunar í miðbænum. Það atkvæði náðist einnig hugsanlega á upptöku.

Heilt yfir voru 58 mál bókuð hjá lögreglunni frá fimm í gær til fimm í morgun. Þar af voru tveir ökumenn handteknir vegna gruns um akstur undir áhrifum áfengis og/eða fíkniefna. Skráningarmerki voru tekin af 56 bílum sem ekki voru tryggðir.