Innlent

Leggja til skimun á Keflavíkurflugvelli í stað sóttkvíar

Kristín Ólafsdóttir skrifar
Katrín Jakobsdóttir forsætisráðherra kynnir afléttingar á ferðatakmörkunum á fundi í Safnahúsinu nú klukkan þrjú. Í baksýn eru Þórdís Kolbrún Reykfjörð Gylfadóttir ferðamálaráðherra, Guðlaugur Þór Þórðarson utanríkisráðherra, Sigurður Ingi Jóhannsson samgönguráðherra, Svandís Svavarsdóttir heilbrigðisráðherra og Áslaug Arna Sigurbjörnsdóttir dómsmálaráðherra.
Katrín Jakobsdóttir forsætisráðherra kynnir afléttingar á ferðatakmörkunum á fundi í Safnahúsinu nú klukkan þrjú. Í baksýn eru Þórdís Kolbrún Reykfjörð Gylfadóttir ferðamálaráðherra, Guðlaugur Þór Þórðarson utanríkisráðherra, Sigurður Ingi Jóhannsson samgönguráðherra, Svandís Svavarsdóttir heilbrigðisráðherra og Áslaug Arna Sigurbjörnsdóttir dómsmálaráðherra. Vísir/vilhelm

Stefnt er að því að eigi síðar en 15. júní næstkomandi geti þeir sem koma til landsins, Íslendingar jafnt sem erlendir ferðamenn, farið í COVID-19 próf á Keflavíkurflugvelli. Reynist það neikvætt þurfa þeir ekki að fara í tveggja vikna sóttkví. Þetta tilkynnti Katrín Jakobsdóttir á blaðamannafundi ríkisstjórnarinnar nú fyrir skömmu. 

Á fundinum kom einnig fram að Grænland og Færeyjar hafi verið tekin af lista yfir hááhættusvæði og nýjar reglur um útvíkkaða sóttkví fyrir þá sem hingað koma til starfa í afmörkuð verkefni taka gildi á föstudag.

Blaðamannafundurinn var haldinn í Safnahúsinu við Hverfisgötu klukkan 15 í dag. Boðað var að þar yrðu kynntar afléttingar á ferðatakmörkunun, sem hafa verið í gildi vegna kórónuveirufaraldursins frá því í mars. 

Núverandi fyrirkomulag er í gildi til 15. maí. Fyrirkomulagið kveður á um bann við komum ríkisborgara utan EES og EFTA til landsins. Þá er öllum þeim sem hingað koma skylt að sæta tveggja vikna sóttkví.

Klippa: Ríkisstjórnin kynnir afléttingu ferðatakmarkana

Niðurstaða á að geta legið fyrir samdægurs

Auk áðurnefndrar niðurstöðu úr skimun á Keflavíkurflugvelli er gert er ráð fyrir að nýleg vottorð um sýnatöku erlendis verði tekin til greina meti sóttvarnalæknir þau áreiðanleg. Þessi tímasetning er með fyrirvara um að áætlanir um afléttingu takmarkana innanlands gangi eftir og með hliðsjón af þróun faraldursins hérlendis og erlendis.

Fyrirhugað er að veirufræðideild Landspítala Háskólasjúkrahúss annist sýnatöku á Keflavíkurflugvelli og greiningu. Niðurstaða á að geta legið fyrir samdægurs og er gert ráð fyrir að farþegar geti farið til síns heima eða á gististað uns hún liggur fyrir.

Fyrirkomulagið verður endurmetið þegar tveggja vikna reynsla er komin á það, m.a. út frá því hvort herða þurfi aftur aðgerðir eða hvort frekari tilslakanir séu forsvaranlegar. Ef skimun á Keflavíkurflugvelli reynist vel þarf einnig að huga að fyrirkomulagi á öðrum landamærastöðvum.

Grænland og Færeyjar tekin af listanum

Katrín kynnti einnig á fundinum nú klukkan þrjú að sóttvarnalæknir hafi lagt það til við heilbrigðisráðherra að nýjar reglur verði settar um sóttkví frá og með 15. maí, þ.e. næsta föstudag. Sú sóttkví verði útvíkkun á því sem hefur verið kallað Sóttkví B og mun ná til þeirra sem koma hingað til starfa í afmörkuð verkefni, svo sem kvikmyndagerðafólk, fréttamenn, vísindamenn og íþróttafólk. Nánari upplýsingar um Sóttkví B má nálgast hér. 

Þá hefur heilbrigðisráðherra fallist á tillögu þess efnis að taka Færeyjar og Grænland, þar sem veiran hefur ekki greinst lengi, af lista yfir hááhættusvæði. Öllum þeim, sem koma til Íslands frá löndum sem skilgreind eru af sóttvarnalækni sem hááhættusvæði, sem hingað til hafa verið öll lönd, er skylt að fara í sóttkví í 14 daga frá komu til landsins. Tilslakanir verða þannig gerðar á reglum um sóttkví fyrir þá sem koma frá Grænlandi og Færeyjum.

Fréttin hefur verið uppfærð.


Tengdar fréttir

Af hverju leggst veiran harðar á karla en konur?

Ýmislegt bendir til þess að karlar séu í meiri hættu á að veikjast alvarlega af kórónuveirunni. Ný bresk rannsókn sýnir fram á að karlmenn þar í landi áttu talsvert meira á hættu að látast úr veirunni en konur.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.