Myndlist á klósettinu

„Við erum svo miklir listunnendur á Bast,“ segir Dóra Takefusa, eigandi Basts, en á föstudaginn hyggst hún opna myndlistargallerí inni á einu af salernum kaffihússins Bast á Hverfisgötu.

Hugmyndin er fengin frá listakonunum Rakel McMahon, Jóhönnu Kristbjörgu og Ragnheiði Káradóttur, en þær stöllur ráku hið nýstárlega sýningarými Gallerí Klósett við Hverfisgötu 61 sem lokaði fyrir tæpu ári.

„Mér finnst þetta svo mikil snilldarhugmynd og algjör synd að væri ekki virkt. Þess vegna ákvað ég með þeirra samþykki að endurvekja þetta óhefðbundna sýningarrými og opna hjá mér Studio Salerni,“ segir Dóra, sem hlakkar til að takast á við gallerírekstur.

„Eins og nafnið gefur til kynna er sýningarrýmið inni á salerni, eða í sal þar sem maður gengur örna sinna,“ segir Dóra, kímin.

Í dag verður fyrsta myndlistarsýning Studio Salernis.

„Okkur fannst tilvalið að Rakel McMahon myndi vígja galleríið,“ útskýrir Dóra.

Rakel hefur getið sér gott orð sem myndlistarkona undanfarin misseri.

„Rakel hefur haldið einkasýningar út um víðan völl og tekið þátt í fjölda samsýninga, og rekstri alls kyns verkefna á sviði menningar og lista. Hún er stjórnarmeðlimur Nýlistasafnsins og annar hluti tvíeykisins Wunderkind Collective,” segir Dóra. 

Viðfangsefni Rakelar einkennast gjarnan af tvíræðni, myndlíkingu og endurmati á viðteknum samfélagsnormum. 

„Mér finnst Rakel svo dásamlegur myndlistarmaður því það er líka svo mikill húmor í verkunum hennar sem snúast oft um kyn, kynhlutverk, kynhneigð, klisjur og staðalímyndir!“ segir Dóra að lokum og hvetur sem flesta til að kíkja við á opnunina á föstudaginn kl. 17.00.