Sýkna Kristjáns Arasonar staðfest

Kristján Arason þarf ekki að greiða slitasjórn Kaupþings rúmlega hálfan milljarð króna.  Hæstiréttur Íslands staðfesti í dag dóm Héraðsdóms Reykjaness sem sýknaði Kristján Arason af kröfum Kaupþings í júlí í fyrra.

Kristján, sem var á sínum tíma yfirmaður eignastýringar Kaupþings, var krafinn um 534 milljónir króna ásamt vöxtum af slitastjórn bankans vegna hlutabréfakaupa í bankanum.

Kristján tók lánin í eigin nafni en færði hins vegar skuldina yfir í einkahlutafélagið 7 hægri ehf. í febrúar árið 2008. Það félag var tekið til gjaldþrotaskipta í desember tveimur árum síðar. Engar eignir fundust í búinu. Skuldin við Kaupþing stóð þá í rúmum tveimur milljörðum króna en Kristján var hins vegar í persónulegri ábyrgð upp á 534 milljónir.

Í dómi Hæstaréttar segir að ekki hafi verið sýnt fram á að Kristján hafi valdið bankanum bótaskyldu tjóni með háttsemi sinni. Kaupþing þarf að greiða Kristjáni 800 þúsund krónur í málskostnað fyrir Hæstarétti.