Eins og skólatöskur í framan

Allir ljósabekkir verða horfnir af sundstöðum höfuðborgarinnar frá og með áramótum vegna hættunnar sem fylgir mikilli notkun þeirra. Aðstoðarlandlæknir segir öfugsnúið að bjóða upp á heilsuspillandi ljósabekki á líkamsræktarstöðvum og bendir á að krakkar sem stundi þá geti litið út eins og skólatöskur í framan síðar á ævinni. Bárður Sigurgeirsson húðlæknir segir í nýjasta riti Læknablaðsins að það sé sérstakt áhyggjuefni hve ljósabekkjanotkun virðist algeng hjá börnum og unglingum. Hann segir það sjálfsagða kröfu í ljósi skaðsemi ljósabekkja að þeir verði fjarlægðir frá opinberum stöðum á borð við sundlaugar og líkamsræktarstöðvar. Undir þetta tekur landlæknisembættið sem lét málið fyrst til sín taka fyrir um áratug en Matthías Halldórsson aðstoðarlandlæknir segir þá hafa verið lagt til að banna krökkum undir 18 ára aldri að nota ljósabekki. Það hafi hins vegar ekki verið pólitískur vilji fyrir því á þeim tíma og þess í stað hafi fræðsla verið sett í gang. Matthías segir öfugsnúið að hafa ljósabekki á líkamsræktarstöðvum og ekki ósvipað því að selja tóbak á stöðum sem ætlaðir séu til heilsueflingar því ljósabekkirnir séu í raun heilsuspillandi. Hann segir unga krakka ekki skilja nægilega vel hvað felist í húðkrabbameini. Húðin verði „ljót og hrukkótt og þeir sem eru lengi í sól verða eins og skólatöskur í framan,“ segir Matthías. Það sé hins vegar það sem krakkar vilji væntanlega síst.      Borgaryfirvöld hafa látið sig þessi mál varða og segir Anna Kristinsdóttir, formaður ÍTR, að dregið hafi mjög mikið úr notkun bekkjanna á líkamsræktarstöðvum, eflaust einnig vegna umræðunnar um skaðsemi bekkjanna.