Aldur feðra ráðandi þáttur þegar kemur að stökkbreytingum

Aldur feðra, þegar getnaður á sér stað, er ráðandi þáttur þegar kemur að stökkbreytingum. Þetta leiðir ný rannsókn Íslenskrar erfðagreiningar, eða DeCode í ljós.

Rannsóknin birtist í hinu virta tímariti Nature í dag en hún beindist að því að reyna að skilja tíðni nýrra stökkbreytinga í erfðamengi Íslendinga. Niðurstöðurnar byggðust á því að rannsaka sjötíu og átta feður og mæður, og að minnsta kosti eitt barn þeirra. Leitað var að breytanleikum í erfðamengi barnsins sem ekki fundust í erfðamengi foreldranna.

„Ef þú veltir þér hvað stökkbreytingar gera, þá eru það þær sem búa til nýjan breytileika í erfðamengi okkar og eru á þann hátt mikilvægar til þess að undirbúa okkur undir nýjan heim, hjálpa okkur að aðlagast nýjum heimi," segir Kári stefánsson forstjóri Íslenskrar erfðagreiningar sem fór fyrir rannsókninni. Hann segir mjög mikilvægt að vita hvað það er í okkar samfélagi sem hafi áhrif á tíðni stökkbreytinga.

Stökkbreytingatíðnin verður fyrir mjög litlum öðrum áhrifum en þeim sem eiga rætur sínar í aldri föður. Þannig að það er næstum því ekkert annað, mjög lítið í okkar umhverfi sem hefur áhrif á stökkbreytingartíðni, en aldur föður.

Ástæðan fyrir þessu er sú að egg móðurinnar myndast öll strax á fósturskeiði. Kynfrumur karla myndast hinsvegar fram á háan aldur.

„Ef þú tekur sjúkdóma eins og geðklofa eða einhverfu að þá eru líkur á því fertugur faðir eignist barn sem endanlega fær geðklofa eða einhverfu eru tvisvar sinnum meiri heldur en hjá tvítugum manni. Þá er mjög freistandi að komast að þeirri niðurstöðu að þessi aldursaukning eigi rætur í þessum stökkbreytingum."

Kári segir þó að menn eigi að fara varlega í að nota niðurstöðurnar til að taka „dramatískar ákvarðanir um sjálfan sig og mögulega afkomendur sína."

„En þetta er eitt af mörgum hlutum sem ég held að menn eigi að hyggja að."