Segja brettagarð og breytt bílastæði þrengja að Þrótti

Verið er að ljúka framkvæmdum á brettagarði í Laugardal, á sama stað og Þróttur hafði hugsað sér íþróttahús. Einnig á að lagfæra bílastæðin við gervigrasvöllinn en þá missa Þróttur og Ármann um 50 til 60 stæði.

„Það er verið að þrengja verulega að Þrótti,“ segir Pétur Stephensen, framkvæmdastjóri Þróttar. Nú eru framkvæmdir á brettagarði í Laugardal á lokastigi en á sama stað höfðu Þróttarar í hyggju að byggja íþróttahús sitt í framtíðinni.

Í framhaldi af framkvæmdunum við brettagarðinn á að gera breytingar á bílastæðinu fyrir framan gervigrasvöllinn í Laugardal og við það fækkar bílastæðum þar, sem nú eru um 50 til 60.

Þróttur hefur verið með aðstöðu í Laugardalshöllinni en Sigurlaugur Ingólfsson, formaður aðalstjórnar Þróttar, segir að hún hafi oft verið umsetin vegna annarra íþróttaviðburða eða tónleikahalds. „Þetta hefur nú aðeins skánað eftir tilkomu Hörpu en við höfum samt verið að missa marga æfingartíma,“ segir hann.

Hann segir enn fremur að nú sé verið að vinna að heildarskipulagningu á svæðinu. „Og við munum náttúrlega reyna að koma því á framfæri við borgina þegar það er tilbúið,“ segir hann. Honum sýnist hins vegar búið að valda reitinn sem hugsaður hafði verið fyrir íþróttahúsið. „Við höfum aðallega horft á þennan stað upp á tengingu við félagsheimilið. Í raun er ekki um aðra staði að ræða, svona í fljótu bragði séð.“ Pétur segir að fækkun bílastæða komi sér afar illa fyrir félagið. „Við erum á góðri leið með að komast í úrvalsdeildina og við viljum ómögulega að áhorfendur þurfi að borga sektir eftir hvern heimaleik eins og gerst hefur annars staðar,“ segir hann.

Brynjólfur Óskarsson, vallarvörður hjá Þrótti, segir félagið ekki mega við því að missa bílastæði. „Ef eitthvað er um að vera annaðhvort í Höllinni eða á Laugardalsvelli þá fyllast okkar stæði undir eins,“ segir hann. Jón Þór Ólason, framkvæmdastjóri Ármanns sem er einnig með aðsetur á svæðinu, segist bæði sjá agnúa og jákvæða hluti varðandi framkvæmdirnar á bílastæðinu. „Það er náttúrlega ánægjuefni að verið sé að taka þetta í gegn en þetta hefur verið til háborinnar skammar,“ segir hann. „Við höfum lengi viljað fá lýsingu á svæðinu en ekki getað gert það sjálfir þar sem borgin á svæðið svo ég fer ekki að agnúast út af því að farið sé í betrumbætur. En hitt er annað mál að bílastæðið er alltof lítið fyrir okkur svo það er engan veginn hægt að gleðjast yfir því að verið sé að klípa af því.“

jse@frettabladid.is