"Fólk brosir bara að þessu öllu"

„Það þarf ekkert að halda víni frá þessu fólki. Þetta er fullorðið fólk sem kann sínum fótum forráð." Þetta segir Sigurður Einarsson, framkvæmdastjóri Félags eldri borgara.

Borgarráð Reykjavíkur samþykkti í dag tillögu Júlíusar Vífils Ingvarssonar, borgaráðsfulltrúar Sjálfstæðisflokksins, um að reglum um vínveitingaleyfi verði breytt svo að dvalarheimili aldraðra geti fengið leyfi til að selja áfengi.

Sannarlega eru skiptar skoðanir um málið innan félagsins að mati Sigurðar. „En almennt séð held ég að fólk brosi bara að þessu öllu, að það eigi að vera hafa vit fyrir fólki sem komið er þennan aldur.

Samþykkt Borgarráðs gerir ráð fyrir að málsmeðferðarreglum um veitinga- og gististaði verði breytt svo að ráðið fái heimild til að veita dvalarheimilum aldraðra sem staðsett eru innan íbúðarsvæðis vínveitingaleyfi.

„Auðvitað á ekki að ota áfengi að fólki," segir Sigurður. „Það er matstaður á Hrafnistu og kaffihús. Það þykir nú yfirleitt sjálfsagður hlutur að hægt sé að kaupa vínföng á slíkum stöðum. Það er lítið vit í því að hafa sérstakar reglur fyrir eldri borgara sem ekki gilda fyrir alla."