Baltasar bíður eftir svari

"Það fara að koma stórtíðindi," segir leikstjórinn Baltasar Kormákur aðspurður um næsta leikstjórnarverkefni sitt, Little Trip to Heaven, en Baltasar bíður nú eftir svari frá leikkonu sem hann vonast til að fari með aðalhlutverk í kvikmyndinni. "Þetta er mjög heitt mál en ég get ekkert sagt um þetta á þessu stigi því það væri óvirðing við leikkonuna," segir Baltasar en játar þó að leikkonan sem umræðir sé bandarísk stórstjarna, kona sem allir þekkja." Tökur á Little Trip to Heaven eru nú alveg að fara af stað en áætlað er að hefjast handa í kringum 20. ágúst. Myndin verður tekin upp hér heima á Íslandi og að öllum líkindum einnig í Minnesota í Bandaríkjunum. Stórleikarinn Forest Whitaker hefur, sem kunnugt er, samþykkt að leika í kvikmyndinni sem fjallar um fólk sem stundar tryggingasvindl. Little Trip to Heaven er þriller í anda film noir en handritið er eftir Baltasar Kormák og Edward Weinman. "Við erum búin að ráða til okkar kvikmyndatökumann sem heitir Óttar Guðnason en hann er sá efnilegasti sem við Íslendingar eigum. Óttar hefur verið að taka upp efni út um allan heim, hefur unnið í stórum auglýsingum og verið aðaltökumaður kvikmyndaleikstjórans og tökumannsins Jan De Bont," segir Baltasar en Jan De Bont leikstýrði meðal annars kvikmyndinni Speed og sá um myndatöku í Lethal Weapon og Basic Instinct svo eitthvað sé nefnt. Það verða augljóslega engir aukvisar á ferð í Little Trip to Heaven. Sá sem sér um áhættuatriðin í kvikmyndinni kemur til dæmis einnig til með að sjá um áhættuatriðin fyrir Spielberg í næstu kvikmynd stórleikstjórans. Búið er að selja handritið að Little Trip to Heaven á topp prís til dreifingaraðila um alla Skandinavíu að sögn Baltasars. "Það er kominn mikill sprettur í verkefnið núna og það tekur yfir allan minn tíma," segir Baltasar en fyrirtæki hans Sögn, framleiðir myndina ásamt Sigurjóni Sighvatssyni.