Borgin mun koma götulýsingunni í stand

Borgaryfirvöld munu á næstu dögum gera út starfsmenn til að skipta um perur í ljósastaurum borgarinnar og ganga úr skugga um að borgin sé vel upp lýst þegar skammdegið færist yfir. Víða vantar perur eins og stendur, líkt og lögreglan í borginni benti á í dag.

„Þetta er auðvitað öryggisatriði og við munum kippa þessu í liðinn á næstu dögum," segir Jón Halldór Jónasson, upplýsingafulltrúi á framkvæmdasviði borgarinnar. „Okkur er sérstaklega umhugað um þann tíma morgunsins þegar börn eru á leið í skóla. Enn sem stendur er tiltölulega bjart á þeim tíma og viðhaldi verður lokið áður en aldimmt verður á morgnanna."

Það er Orkuveita Reykjavíkur sem sér um viðhaldið en Reykjavíkurborg stjórnar þjónustustiginu. Þessa dagana eru starfsmenn borgarinnar að vinna að viðhaldi á skólalóðum og leikskólalóðum svo þau svæði séu vel upplýst.