Ógjörningur er að meta tjónið

Um sex hundruð íbúar Kleppsvegar og nágrennis fengu að halda heim um miðjan dag í gær eftir að hafa þurft að yfirgefa híbýli sín í hasti undir miðnætti í fyrrakvöld. Enn er ógjörningur að meta tjónið sem hlaust af en ljóst að það er umtalsvert. Skemma Hringrásar varð eldinum að bráð og allt sem í henni var auk þess sem talsverð verðmæti voru í dekkjahaugnum sem brann til kaldra kola. Starfsemi lá niðri í mörgum nærliggjandi fyrirtækjum í gær og eigur sumra þeirra eyðilögðust vegna reyks og sóts. Matvælafyrirtæki í grenndinni þurfti að farga allri framleiðslu sinni. Ónefndar eru þær skemmdir sem urðu á heimilum. Á fjórða hundrað tók þátt í samhæfðum aðgerðum björgunaraðila og hafa ekki fleiri komið að slíkum verkum fyrr. Um 80 slökkviliðsmenn stóðu í ströngu um langa hríð, yfir 30 lögreglumenn komu að verkinu, 90 björgunarsveitarmenn og 50 liðsmenn Rauða krossins auk fjölda annarra, til dæmis bílstjóra og þungavélastjóra. Mönnum ber saman um að allar aðgerðir hafi tekist vel og gott samstarf ríkt. Hringrás hefur komið töluvert við sögu á liðnum árum vegna mengunar í jarðvegi. Árið 1989 greindist eiturefnið PCB í jarðvegi á athafnasvæði þess en umhverfisráðuneytið gaf út fyrsta starfsleyfi fyrirtækisins 1991. Tveimur árum síðar var fullyrt að PCB-mengun á lóð Hringrásar væri eitt mesta umhverfisvandamál sem komið hefði upp á Íslandi. Þá vildi Katrín Fjeldsted, þáverandi formaður heilbrigðisnefndar Reykjavíkur, að fyrirtækið yrði flutt af núverandi athafnasvæði. Heilbrigðiseftirlit borgarinnar gaf hins vegar út leyfi í september 1999 til 5 ára og rann það út í haust. Þá hófst vinna við endurnýjun leyfisins. Árið 2001 sekkjaði fyrirtækið PCB-menguðum jarðvegi sem komið var fyrir í landfyllingu í Sundahöfn og á lóð fyrirtækisins.