Slysin gera ekki boð á undan sér

"Það veit enginn hvenær slysin verða" segir forstöðumaður Umhverfisstofu sem hefur eftirlitsskyldu með fyrirtækjum á borð við Hringrás. Starfsleyfi fyrirtækisins var útrunnið en líkur á að úr því yrði bætt á næstunni. Hjá Umhverfisstofu sáu menn ekki eldhættu í háum dekkjahaug en það gerði Eldvarnareftirlitið svo sannarlega. Um þrjú hundruð manns tóku þátt í aðgerðum vegna brunans í Hringrás í nótt. Ekki er hægt að segja að þetta slys og afleiðingar þess ættu að hafa komið öllum á óvart, en forvarnardeild Slökkviliðs höfuðborgarsvæðisins á hætturnar með bréfi 4. júní. Í bréfinu segir að haugarnir séu það stórir að almannahætta gæti orðið kviknaði í þeim og búast mætti við að rýma þyrfti stór svæði. Óskað er eftir svari innan tíu daga. Svarið kom 30. september og þá er því lofað að dekkjabirgðir muni minnka umtalsvert strax í upphafi nóvembermánaðar. Við það var ekki staðið. Hrólfur Jónsson, slökkviliðsstjóri, segir að nauðsynlegt sé að gæta að góðum stjórnsýsluháttum. Hann segir að ákveðið hafi verið að gefa fyrirtækinu kost á að andmæla, vikurnar hafi liðið og á endanum hafi komið bréf þar sem sagt hafi verið að dekkjahaugurinn væri á leið burt, en það hafi bara verið of seint. Einar Ásgeirsson, framkvæmdastjóri Hringrásar, segir að dekkin muni fara til urðunar hjá Sorpu og staðið verði við það sem lofað var í bréfinu. Hann segir að fyrirtækið hafi einungis takmarkað pláss og því hafi ekki verið auðvelt að bregðast strax við. Aðalatriðið sé að þetta verði tryggt til framtíðar. Tryggðar verði steyptar einingar, svo staðan verði viðráðanleg. einar segir hug manna allan hjá því fólki sem þurft hafi að yfirgefa heimili sín í nótt og fjárhagslegt tjón sé léttvægt í samanburðinum. Hringrás hefur verið starfandi í næstum fimmtíu og fimm ár. Það hefur á tíðum verið umdeilt vegna mengunarhættu en unnið hefur verið að því að kippa því í liðinn. Fyrir þremur árum var pcb mengaður jarðvegur settur í hólka og komið fyrir annars staðar á lóðinni en þar sem eldurinn kviknaði. Leyfi er fyrir geymslu jarðvegsins þar, vegna þess að enginn losunarstaður er til á landinu fyrir þess háttar úrgang. Starfsleyfi Hringrásar rann út í september og er það í hlutverki Umhverfis- og heilbrigðistofa að endurnýja það. Búast má við að fyrirtækið hefur fengið endurnýjun hvað á hverju að sögn forstöðumannsins, Ellý Guðmundsdóttir. Hún segir að slysin geri ekki boð á undan sér og ekki hafi verið talin ástæða til þess að fara fram á lokun fyirtækisins innan við mánuði eftir að bent var á hnökrana. Þetta hafi ekki verið metið sem bráð hætta.