Verk­falls­sjóður Eflingar getur staðið undir mjög löngu verk­falli

Ótímabundið verkfall Eflingar gagnvart Reykjavíkurborg hófst í nótt. Ríkissáttasemjari hefur boðað til sáttafundar í deilunni í fyrramálið. Verkfallssjóður Eflingar getur staðið undir mjög löngu verkfalli.

Félagsmenn Eflingar komu saman til fundar í dag þar sem baráttumóð var blásið í hópinn. Þrír milljarðar eru í verkfallssjóði Eflingar sem Sólveig Anna segir standa undir mjög löngu verkfalli. Sáttasemjari hefur boðað samninganefndir Eflingar og borgarinnar til fundar í fyrramálið og er það langþráður fundur að mati Sólveigar.

„Við erum orðin óþreyjufull eftir því að fundur í deilunni verði boðaður svo að við getum farið að ræða okkur að einhverri lausn.“

Sjá einnig: Boðað til fundar milli Eflingar og Reykjavíkurborgar

Undanþágunefnd Eflingar ákvað að veit viðkvæmustu þjónustu Reykjavíkuborgar auknar undanþágur frá aðgerðunum. Sólveig segir það sanna mikilvægi Eflingarfólks.

„Hvaða algjöru grundvallarhlutverki þau gegna í þessu samfélagi, hversu þessar stofnanir eru reknar á lítilli mönnun og hversu svívirðilegt það er að hafa þetta mikilvæga starfsfólk á þeim ömurlegu launum sem raun ber vitni,“ segir Sólveig.

Auknar undanþágur voru til dæmis veittar á hjúkrunarheimilinu Droplaugarstöðum vegna þrifa og uppvasks.

„Maður hefði horft fram á sýkingarhættu og annað slíkt. Eins og síðasta föstudagsmorgun þegar komið var hér og við máttum fara að þvo aftur. Lyktina lagði langt fram á ganga og við það er ekkert búið. Maður veit bara ekkert hvert það myndi leiða, myndi heilbrigðiseftirlitið hreinlega okkur stoppa okkur hér?“ spyr Jórunn Frímannsdóttir, forstöðumaður Droplaugarstaða.

Undanþágur fást hins vegar ekki fyrir þrifum í skólum. Það gæti haft áhrif á kennslu í Réttarholtsskóla, Grandaskóla og Seljaskóla svo dæmi séu tekin.

„Það yrðu þá ákveðin svæði skólabyggingar sem eru þá bara lokuð. Í skólum eins og Réttarholtsskóla þar sem þetta eru sex stöðugildi starfsmanna sem eru að sinna ræstingum, það þýðir að það er öll byggingin undir og það kallar á sértæk viðbrögð þar,“ segir Helgi Grímsson, sviðsstjóri skóla- og frístundasviðs.

Hann segir þau skilaboð hafa verið send út að skipulagi skuli vera breytt eins og hægt er en svo verði aðstæðubundið hvernig brugðist er við.

Greitt atkvæði um verkfallsboðun félagsmanna BSRB 

Atkvæðagreiðsla átján þúsund félagsmanna BSRB um verkfallsboðun hófst í dag og stendur atkvæðagreiðslan til miðvikudags . Fari svo að aðgerðir verði samþykktar hefjast þær þann 9. mars og verða tvíþættar.

„Annars vegar sameiginleg verkföll aðildarfélaga BSRB, tímabundnar aðgerðir sem varða þá stofnanir eins og Landspítalann, heilbrigðisþjónustu og velferðarþjónustu. Þetta er líka hjá sveitarfélögunum um allt land. Frístundaheimilin, leikskólarnir, þjónusta við aldrað fólk og fatlað fólk. Síðan verður á sama tíma, 9. mars þegar þetta hefst, að þá verður á tilteknum vinnustöðum lögð niður störf að öllu leyti og það er aðallega hér á höfuðborgarsvæðinu,“ segir Sonja Ýr Þorbergsdóttir, formaður BSRB.

Þær stofnanir verða Ríkisskattstjóri og sýslumannsembættin og einnig skólar á höfuðborgarsvæðinu. Sonja Ýr segir kröfur félagsmanna hafa legið fyrir í heilt ár og þeir hafi verið kjarasamningslausir í þann tíma.

„Megináherslan hjá okkur er að stytta vinnuvikuna. Við erum líka með kröfur um jöfnun launa á milli markaða og það sem eftir stendur núna eru þessi stóru mál og svo er launaliðurinn sjálfur hjá aðildarfélögunum.“