Fyrr­verandi gjald­keri UMFG á­kærður fyrir fjár­drátt

Fyrrverandi gjaldkeri Ungmennafélags Grundarfjarðar, UMFG, hefur verið ákærður af héraðssaksóknara fyrir fjárdrátt. UMFG kærði manninn þann 2. ágúst 2018 vegna gruns um brot og hefur málið verið í rannsókn hjá héraðssaksóknara síðan. Þá er hann ákærður fyrir peningaþvætti þar sem hann nýtti fjármunina í eigin þágu. Mbl.is greindi fyrst frá ákærunni.

Maðurinn sat í stjórn UMFG um margra ára skeið og gegndi meðal annars embætti gjaldkera fram til ársins 2015 í það minnsta. Þá á fjárdrátturinn að hafa hafist í mars árið 2011 og staðið yfir þar til í október 2017. Maðurinn tók reglulega tugi þúsunda króna út af reikningum félagsins og dró hann mest að sér 250 þúsund krónur í einstaka færslu.

Í heildina dró maðurinn að sér rúmar 12 milljónir króna í 248 millifærslum. Þá á hann að hafa fært peninga út af fjórum mismunandi reikningum félagsins ýmist yfir á eigin reikning eða reikninga ófjárráða dóttur sinnar.