Fimm dæmdir til dauða vegna morðsins á Jamal Khas­hoggi

Dómstóll í Sádi-Arabíu hefur dæmt fimm manns til dauða vegna morðsins á blaðamanninum Jamal Khashoggi.

Frá þessu segir í frétt BBC. Khashoggi var mjög gagnrýninn á stjórnvöld í heimalandi sínu og var myrtur á af sádiarabískum útsendurum á ræðismannsskrifstofu Sádi-Arabíu í tyrknesku stórborginni Istanbúl í október 2018.

Alls voru ellefu manns ákærðir í málinu og sagði saksóknari í Sádi-Arabíu morðið vera aðgerð sem framkvæmd var að frumkvæði útsendaranna sjálfra. Hinir ákærðu og dæmdu hafa ekki verið nafngreindir.

BBC segir að Agnes Callamard, rannsakandi á vegum Sameinuðu þjóðanna, hafi komist að því eftir rannsókn að morðið hafi verið „aftaka án dóms og laga“. Hafi hún þó hvatt til þess að aðkoma Mohammed bin Salman, krónprins Sádi-Arabíu, verði rannsakaður. Hann hefur neitað því að hafa átt þátt í morðinu, en að hann, sem leiðtogi landsins, tæki fulla ábyrgð.

Þrír hinna ákærðu hlutu 24 ára fangelsisdóma vegna morðsins.