Erlent

Lýst eftir for­eldrum yfir­gefinna barna í Dan­mörku

Hallgerður Kolbrún E. Jónsdóttir skrifar
Börnin fundust yfirgefin í götunni Park Allé í Árósum.
Börnin fundust yfirgefin í götunni Park Allé í Árósum. Østjyllands Politi

Lögreglan á Austur-Jótlandi hafa enn ekki fundið foreldra eða aðra ættingja tveggja ungra barna sem fundust í gær í götunni Park Allé í miðborg Árósa. Lögreglan birti í dag myndir af börnunum, eins árs gamalli stelpu og tveggja og hálfs árs gömlum stráki. Frá þessu er greint á vef danska ríkisútvarpsins.

Ekkert var í fórum barnanna sem gefur lögreglunni vísbendingar um hverjir foreldrar þeirra gætu verið en þau fundust í götunni á laugardagskvöld.

Stúlkan er aðeins árs gömul. Østjyllands Politi

Leitað var í næsta nágrenni að vísbendingum um foreldrana en ekkert fannst.

Bæði börnin eru dökk á hörund og telur lögreglan líklegt að þau séu ættuð frá Austur-Evrópu. Í gærkvöldi greindi Lars Bisgaard, lögreglustjóri, frá því að strákurinn hafi talað örlítið á lögreglustöðinni en enginn hafi skilið tungumálið sem drengurinn talaði.

Börnin eru talin ættuð frá Austur-Evrópu. Østjyllands Politi

Lögreglan hefur í fórum sínum myndbandsupptökur úr öryggismyndavélum í götunni sem verið er að skoða og vonast hún til að foreldrar barnanna sjáist á upptökunni.

Lögreglan hvetur einnig almenning til að hafa samband hafi einhver séð börnin. Þau voru tilkynnt af almenningi í gær en drengurinn stóð við hlið kerrunnar sem stúlkan lá í. Þau höfðu verið ein í nokkurn tíma.

Börnin eru nú hjá barnaverndaryfirvöldum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.