Innlent

Svona flugvöll vilja ráðamenn Icelandair sjá í Hvassahrauni

Kristján Már Unnarsson skrifar
Svona gæti innanlands- og millilandaflugvöllur litið út í Hvassahrauni. Fjær má sjá álverið í Straumsvík og byggðina í Hafnarfirði. Lega flugbrauta er sýnd miðað við niðurstöður sem þegar liggja fyrir úr veðurfarsrannsóknum.
Svona gæti innanlands- og millilandaflugvöllur litið út í Hvassahrauni. Fjær má sjá álverið í Straumsvík og byggðina í Hafnarfirði. Lega flugbrauta er sýnd miðað við niðurstöður sem þegar liggja fyrir úr veðurfarsrannsóknum. Mynd/Goldberg Partners International.

Ráðamenn Icelandair vilja að Hvassahraun verði áfram skoðað sem framtíðarstaðsetning fyrir millilandaflug. Forstjóri félagsins segir að þegar horft sé til framtíðar verði hagkvæmt að hafa sameiginlegan völl fyrir innanlands- og millilandaflug. Þetta kom fram í fréttum Stöðvar 2.

Myndin hér að ofan sýnir hvernig alþjóðaflugvöllur gæti litið út í Hvassahrauni, rétt í jaðri höfuðborgarsvæðisins. Vegalengdin úr miðborg Reykjavíkur yrði aðeins um tuttugu kílómetrar í stað um fimmtíu kílómetra til Keflavíkur. 

Myndin er úr skýrslu Goldberg Partners International, sem birt er sem viðauki með skýrslu stýrihóps samgönguráðuneytis um flugvallakosti suðvestanlands en það var Icelandair sem fékk Goldberg ráðgjafafyrirtækið upphaflega að málinu.

Flugstöðin á myndinni er hönnuð í samstarfi Icelandair og Goldberg til að henta þörfum tengiflugs betur en hægt er á Keflavíkurflugvelli. Flugbrautirnar eru sýndar í brautarstefnu miðað við þær niðurstöður sem þegar liggja fyrir úr veðurfarsrannsóknum, meðal annars með raunverulegu aðflugi á Boeing 757-þotu.

Dagur B. Eggertsson borgarstjóri og Sigurður Ingi Jóhannsson samgönguráðherra kynntu skýrsluna á fimmtudag.

Ráðamenn ríkis og borgar ákváðu fyrir helgi að kanna bara kosti þess að gera innanlandsvöll og æfinga- og kennsluvöll í Hvassahrauni, sem þó geti jafnframt verið varaflugvöllur. Ráðamenn Icelandair eru hins vegar ekki tilbúnir að afskrifa þann möguleika að í Hvassahrauni verði einnig framtíðar millilandaflugvöllur þjóðarinnar. 

„Aðalkosturinn er sá að vera með flugið, bæði innanlands- og millilandaflugið, á einum stað nálægt höfuðborgarsvæðinu. Það er náttúrlega langstærsti kosturinn í þessu, - ef að niðurstaðan er sú að Hvassahraunið hentar vel fyrir flugrekstur vegna veðurs og þessháttar. Sú niðurstaða liggur ekki alveg fyrir á þessu stigi,“ segir Bogi Nils Bogason, forstjóri Icelandair.

Bogi Nils Bogason, forstjóri Icelandair. Mynd/Vilhelm.

Hann segir málið flókið enda snúist það um stórar fjárfestingar. 

„Og það er áframhaldandi þörf á uppbyggingu á Keflavíkurflugvelli næstu árin og þar af leiðandi er þetta mjög flókið viðfangsefni. Það er mjög erfitt að taka ákvörðun um að fara að fjárfesta í glænýjum velli meðan við erum að fjárfesta í öðrum velli samhliða. Þannig að við þurfum að bera virðingu fyrir því að þetta er flókið viðfangsefni. 

En við höfum sagt það samt sem áður að við Íslendingar eigum að horfa til langs tíma í svona stórum ákvörðunum. Og það er okkar afstaða að til langs tíma eigi að horfa til þess að hafa millilanda- og innanlandsflugvöllinn á sama stað. Við teljum að það sé hagkvæmt til lengri tíma fyrir hagkerfið og ferðaþjónustuna,“ segir forstjóri Icelandair. 

Hér má sjá frétt Stöðvar 2:


Tengdar fréttir

Ferðatími milli Hvassahrauns og miðborgar skipti mestu máli

Framkvæmdastjóri Air Iceland Connect segir skipta höfuðmáli upp á framtíð innanlandsflugs í Hvassahrauni að samgöngur þaðan til borgarinnar verði góðar og ferðatíminn stuttur. Það sé gott að búið sé að tryggja flugstarfsemi á Reykjavíkurflugvelli til næstu sautján ára.

Rannsaka aðflugsleiðir yfir Hvassahrauni

Icelandair hefur sent Samgöngustofu beiðni um að hefja flugprófanir yfir Hvassa­hrauni. Kanna aðflug að þremur ímynduðum flugbrautum. Bregðast við ráðleggingum Rögnunefndarinnar um könnun flugvallarskilyrða á staðnum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.