Icelandair vill sameiginlegan innanlands- og alþjóðaflugvöll

Það er mat Icelandair Group að „best færi á því að rekstur innanlandsflugs og alþjóðaflugs væri á sama flugvelli á suðvesturhorninu til langs tíma litið.“ Það sé kostnaðarsamt að að reka innviði fyrir flug á tveimur stöðum þegar ekki eru fleiri notendur en raun ber vitni.

Þar að auki geti mikil tækifæri skapast með því að hafa innanlands- og alþjóðaflug á sama flugvelli að sögn Icelandair - eins og „betri dreifingu ferðamanna um landið og um leið fjölgun ferðamanna í innanlandsflugi og tækifæri til að gera flugvöll á Íslandi að miðstöð vestnorrænna flugtenginga.“

Þetta er meðal þess sem fram kemur í fylgiskjölum við skýrslu um flugvallakosti á suðvesturhorninu og kynnt var af borgarstjóra og samgönguráðherra fyrir helgi.Ríkisútvarpið vakti máls á áherslum Icelandair við vinnslu skýrslunnar, sem flugfélagið vonar að verði ekki „enn ein skýrslan sem engu skilar um þennan mikilvæga málaflokk.“ Nýja skýrslan dró fram kosti þess að leggja og reka flugvöll sem myndi gegna hlutverki innanlandsflugvallar, varaflugvallar og flugvallar fyrir æfinga-, kennslu-, og einkaflug í Hvassahrauni.

Myndi styrkja rekstrargrundvöll innanlandsflugs

Icelandair hefur sjálft kannað möguleikann á sameiginlegum innanlands- og alþjóðaflugvelli í Hvassahrauni. Flugfélagið fékk bandaríska ráðgjafarfyrirtækið Landrum & Brown árið 2015 til að kanna fýsileika þess að byggja slíkan völl, í samanburði við uppbyggingaráform Isavia í Keflavík.

Kostirnir voru metnir út frá sex þáttum og leiddi vinna ráðgjafafyrirtækisins í ljós að nýr millilandaflugvöllur í Hvassahrauni væri betur til þess fallinn að styðja við viðskiptalíkan íslensku flugfélaganna (WOW air var þá enn starfandi) en Keflavíkurflugvöllur.

Sjá einnig: Stefna að því að flytja flugstarfsemi úr Vatnsmýri yfir í Hvassahraun

„Ástæðan var í stuttu máli sú að nýr flugvöllur í Hvassahrauni væri hannaður frá grunni samkvæmt nýjustu viðmiðum um tengiflugvelli en framtíðarhönnun Keflavíkurflugvallar væru hins vegar settar ákveðnar skorður vegna þeirra mannvirkja sem þar eru fyrir,“ segir í viðauka skýrslunnar sem kynnt var fyrir helgi.

Þar segir jafnframt að millilandaflugvöllur í Hvassahrauni byði upp á að samþætta millilanda- og innanlandsflug á einum flugvelli sem væri þar að auki umtalsvert nær höfuðborgarsvæðinu en Keflavíkurflugvöllur. „Forsvarsmenn Icelandair Group töldu að þetta myndi styrkja verulega rekstrargrundvöll innanlandsflugsins þar sem erlendum ferðamönnum sem nýttu sér innanlandsflugið myndi fjölga.“

Veðrið ágætt og sjö ár í smíðum

Landrum & Brown var jafnframt fengið til að greina fyrirliggjandi veðurgögn um flugvallarstæðið í Hvassahrauni, auk þess sem Icelandair stóð sjálft fyrir athugunum á „þess slags veðri sem helst var talið geta valdið vandræðum,“ eins og það er orðað. Samkvæmt skýrslunni kom ekkert út úr þeirri vinnu sem benti til þess að flugvallarstæðið hentaði ekki, það gæti vel hýst flugvöll með háum nýtingarstuðli. Þó er tekið fram að þessar rannsóknir séu ekki tæmandi. Við þetta er að bæta að með nýju skýrslunni ætla ríki og borg að verja 200 milljónum til frekari veðurfarsmælinga og rannsókna.

Þá vann bandaríska ráðgjafafyrirtækið gróft kostnaðarmat á því að byggja flugvöll í Hvassahrauni. Sú greining á að hafa gefið til kynna að nýr flugvöllur þar „yrði ekki mikið dýrari í framkvæmd en uppbygging Keflavíkurflugvallar samkvæmt áætlunum Isavia þegar tekið væri tillit til þess að nýta mætti virði þess lands í Vatnsmýrinni sem losnaði við lokun Reykjavíkurflugvallar til að styðja við framkvæmdina.“ Þó er tekið fram að þetta kostnaðarmat hafi verið „afar gróft“ og að forsvarsmenn Icelandair Group hafi enn talið mikla óvissu um hugsanlegan stofnkostnað þegar vinnu félagsins sleppti. Rétt er að taka fram að nýtt kostnaðarmat, sem unnið var fyrir nýju skýrsluna, gefur hins vegar til kynna að slík framkvæmd væri dýrari en aðrir kostir og myndi kosta um 300 milljarða króna.

Loks leiddi greining Landrums & Browns á svipuðum flugvallarframkvæmdum erlendis í ljós að tíminn frá ákvörðun um uppbyggingu nýs flugvallar til opnunar gæti verið sjö ár ef allt gengi hratt fyrir sig. Áætlanir sem kynntar eru í nýju skýrslu borgar og ríkis gera ráð fyrir sambærilegum árafjölda í uppbyggingu, en að eftir 13 til 17 ára verði hægt að taka völlinn til notkunar.

Skýrsluna sem kynnt var í liðinni viku má nálgast í heild sinni hér.

Fréttin var uppfærð klukkan 16:15