Innlent

Ráðuneytið segir Harald fá 57 milljónir í stað 105

Eiður Þór Árnason skrifar
Frá 1. janúar til 31. mars á næsta ári, mun Haraldur veita dómsmálaráðherra sérstaka ráðgjöf í tengslum við framtíðarskipulag löggæslunnar.
Frá 1. janúar til 31. mars á næsta ári, mun Haraldur veita dómsmálaráðherra sérstaka ráðgjöf í tengslum við framtíðarskipulag löggæslunnar. Vísir/Vilhelm

Kostnaður ríkisins vegna starfslokasamnings Haraldar Johannessens, fráfarandi ríkislögreglustjóra, er talinn vera 56,7 milljónir króna með launatengdum gjöldum.

Er sú upphæð sögð nema 54 prósentum af áætluðum launakostnaði hans út skipunartímann sem ráðuneytið áætlar 104,5 milljónir króna með launatengdum gjöldum. Haraldur var síðast endurskipaður í fyrra og var þá ætlað að gegna embættinu til ársins 2023.

Þetta kemur fram í svari dómsmálaráðuneytisins við fyrirspurn fjárlaganefndar Alþingis vegna starfsloka Haraldar en þar er dómsmálaráðherra jafnframt sagður hafa skort lagaheimild til þess að víkja honum úr embætti að eigin frumkvæði.

Á launum fram til 2021

Haraldur óskaði nýlega eftir því við Áslaugu Örnu Sigurbjörnsdóttur dómsmálaráðherra að fá að láta af embætti. Hann mun hætta sem ríkislögreglustjóri um næstu áramót.

Greint hefur verið frá því að samkvæmt starfslokasamningi verði hann á óskertum launum og starfskjörum fram í lok júní árið 2021. Að því loknu verður hann á biðlaunum fram til ársloka og fær útgreitt áunnið orlof í janúar 2022.

Ráðherra ekki heimilt að víkja Haraldi úr embætti

Í svari ráðuneytisins kemur fram að ríkislögreglustjóri eigi að baki langan embættisferil og njóti því mikilla réttinda. Eru embættismenn sagðir njóta sérstaklega ríkrar réttarverndar á grundvelli stjórnarskrárinnar og ákvæða í lögum um réttindi og skyldur ríkisstarfsmanna.

Sjá einnig: Áslaug Arna var ósátt við viðtal ríkislögreglustjóra

„Þar sem ráðherra var að lögum ekki heimilt að víkja HJ úr starfi varð frumkvæðið að koma frá honum sjálfum. Það var enginn annar grundvöllur fyrir starfslokum.“


Hægt að gangast við því að verið sé að kaupa hann frá starfi

Ráðuneytið gerir ráð fyrir því að starfslokasamningur Haraldar rúmist innan fjárveitinga málaflokksins og að ekki sé þörf fyrir að fjármagna hann sérstaklega.

„Ummæli á þá leið að verið sé að „kaupa“ HJ frá starfi eiga í sjálfu sér við um alla starfslokasamninga hvort heldur sem er hjá einkaaðilum eða opinberum aðilum, kjósi menn að orða hlutina með þeim hætti,“ segir enn fremur í svari ráðuneytisins.


Verði að skoða í ljósi aðstæðna

Haraldur hefur verið í embætti ríkislögreglustjóra í tæp 22 ár eða frá árinu 1998. Fyrr á þessu ári kom fram megn óánægja innan lögreglunnar með störf Haraldar og taldi ráðuneytið nauðsynlegt að taka mið af þeirri stöðu.

Sjá einnig: Lögreglustjórar lýsa yfir vantrausti á Harald

„Ósk HJ um lausn og starfslokasamning verður að skoða í ljósi allra aðstæðna. Upp var komin erfið staða innan lögreglunnar (vantraustsyfirlýsing). HJ ákvað að stíga fram og það frumkvæði er lykill að lausn þess vanda ásamt áformum um sérstakt lögregluráð.“


Tengdar fréttir

Fjárlaganefnd óskar svara um starfslokasamning

Fjárlaganefnd Alþingis hefur óskað eftir svörum frá dómsmálaráðherra um starfslokasamning ríkislögreglustjóra. Nefndin vill meðal annars vita hvernig samningurinn sé fjármagnaður og hver heildarupphæðin sé



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.