Hjónin Bjarney Harðardóttir og Helgi Rúnar Óskarsson, eigendur 66°Norður, hlutu í kvöld verðlaunin Markaðsmaður ársins á Íslensku markaðsverðlaununum.



Verðlaunin voru afhent í Gamla bíói við hátíðlega athöfn og er þetta í annað sinn frá því að verðlaunin voru fyrst veitt árið 1981 sem hjón deila þeim. Verðlaunin eru veitt af ÍMARK, samtökum íslensks markaðsfólks og eru ætluð þeim einstaklingi sem þykir hafa sýnt framúrskarandi árangur í markaðsstarfi á líðandi ári, er segir í tilkynningu frá ÍMARK.



Þar kemur fram að Sjóklæðagerð Íslands hafi verið stofnuð á 66. breiddargráðu á Suðureyri við Súgandafjörð árið 1926 af Hans Kristjánssyni sem ferðaðist til Noregs til að læra að sauma sjóföt.



Tæp níu ár eru frá því að Helgi og Bjarney komu að félaginu. Í fyrra fengu þau bandarískan fjárfestingarsjóð til að koma með aukið fjármagn inn í félagið. Einnig naut það þekkingar og reynslu sjóðsins af því að byggja upp virt vörumerki í fatageiranum.



Í kjölfarið var öll starfsemi fyrirtækisins endurskipulögð með það að markmiði að styrkja innviði þess svo það væri betur í stakk búið til að vaxa enn frekar á erlendri grundu.



Mikil vinna er sögð hafa verið lögð í hönnun og vöruþróun fyrirtækisins en vörur 66°Norður hafa verið í boði í mörgum af virtustu verslunum heims í Evrópu, Bandaríkjunum og Japan, er fram kemur í tilkynningunni. Vörur félagsins einnig sagðar hafa fengið einróma lof í erlendum fjölmiðlum víða um heim.



Uppfært klukkan 21:15. Fréttin var leiðrétt í ljósi þess að sú fullyrðing að Bjarney og Helgi hafi verið fyrstu hjónin til að deila verðlaununum, eins og því var haldið fram í tilkynningu ÍMARK, reyndist röng. Hjónin Bjössi og Hafdís í World Class deildu einnig titilinum árið 2006.