Erlent

Hönd skosks ferðamanns fannst í maga hákarls

Kristín Ólafsdóttir skrifar
Hákarlinn er af tegund tígrisháfa. Mynd er úr safni.
Hákarlinn er af tegund tígrisháfa. Mynd er úr safni. Vísir/Getty

Líkamsleifar skosks ferðamanns, sem ekkert hefur spurst til síðan hann fór að snorkla við strendur frönsku eyjarinnar Réunion um helgina, hafa fundist í maga hákarls.

Í frétt breska dagblaðsins Guardian segir að maðurinn hafi verið 44 ára. Hann hvarf á laugardag og í kjölfarið voru fimm hákarlar veiddir í grennd við eyjuna. Hönd mannsins fannst við krufningu í maga eins hákarlsins, sem staðarmiðlar segja tígrisháf.

Borin voru kennsl á höndina með aðstoð eiginkonu mannsins, sem þekkti giftingarhring mannsins sem enn var á fingri hans. Ekki hefur verið hægt að skera úr um það hvort maðurinn hafi látist við árás hákarlsins eða drukknað og síðar verið étinn.

Eyjan er í Indlandshafi, austan við afrísku eyjuna Madagaskar, og er vinsæll áfangastaður brimbrettakappa. Ágangur hákarla varð þó til þess að brimbrettabrun var að hluta bannað á eyjunni. Tveir hafa þegar látist í hákarlaárás við Réunion það sem af er ári. Veiðimaður lést í janúar eftir að hákarl beit af honum annan fótlegginn og þá lést brimbrettakappi í maí.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.