„Ég get ekki hugsað mér að draga fólk í gegnum eitthvað svona“

Sigrún Ósk Kristjánsdóttir gat ekki hugsað sér að mæta með tökulið til Guðrúnar Andreu Sólveigardóttur þegar hún hafði komist að því að faðir Guðrúnar væri langt leiddur heróínfíkill í fangelsi á Spáni.

Þetta kom fram í máli Sigrúnar Óskar í hlaðvarpinu Á bak við tjöldin á Vísi.

Foreldrar Guðrúnar Andreu voru bara táningar þegar hún kom í heiminn. Þau höfðu kynnst í enskuskóla í Bretlandi. Sólveig frá Íslandi og hann frá Spáni.

Fyrir um áratug ákvað Guðrún að flytja til Barcelona og reyna að finna föður sinn en án árangurs. Leitaði hún til Sigrúnar Óskar sem tók málið að sér í Leitinni að upprunanum.

Ömurlega döpur útkoma

Eftir töluvert grúsk komst Sigrún Ósk í samband við fjölskyldumeðlimi Guðrúnar Andreu á Spáni. Í ljós kom fyrrnefnd niðurstaða sem setti Sigrúnu Ósk í erfiða stöðu.

„Auðvitað er maður í þessu til að búa til gott sjónvarp. En fyrst og síðast langar mig að geta sofið á nóttunni með góða samvisku. Ég get ekki hugsað mér að draga fólk í gegnum eitthvað svona,“ segir Sigrún Ósk.

Hún hitti Guðrúnu Andreu undir fjögur augu og greindi henni frá niðurstöðunni. Sem eðlilega voru ekki þau sem dreymt hafði verið um.

Sjá einnig:Stóðu fyrir utan húsið í Barcelona en þorðu ekki að banka

„Þetta var eitthvað svo ömurlega döpur útkoma og mér fannst einhvern veginn rosalega lítið að græða á því að banka og segja frá þessu með myndavélarnar hangandi yfir okkur og deila því með þjóðinni. Það skrifast á minn reikning.“

Vildi ekki draga sig úr þáttunum 

Guðrúnu Andreu bauðst að draga sig út úr þáttunum í ljósi hinnar sorglegu niðurstöðu. Hún leit hins vegar svo á að hún væri komin með svör og sá líka hag sinn í að upplýsa alla um málið í sjónvarpi frekar en að þurfa að segja öllum frá, einum í einu.

Sigrún Ósk segir þættina ekki gerða til þess að draga fólk í gegnum mikil sárindi. En um leið sé markmið að sýna raunveruleikann eins og hann er.

„Og svona getur útkoman verið. Þetta eru ekki alltaf flugeldar og allt frábært.“

Fyrir hafi legið í upphafi leitarinnar að uppruna Guðrúnar Andreu að útkoman gæti verið leiðinleg.

„Þótt maður sé alltaf að vona að þetta geti farið öðruvísi. Svo hugsar maður að það gæti kannski hjálpað að við séum með. Því kannski hikar fólk við að vera fífl fyrir framan myndavélar. Manni datt það alveg í hug að mögulega gæti það gerst þótt líkurnar væru kannski ekki okkur í hag.“

Þá ræddi Sigrún Ósk hvort niðurstaðan væri sú versta í þremur þáttaröðum Leitarinnar að upprunanum. Minntist Sigrún Ósk meðal annars á að þrátt fyrir allt hefði Guðrún Andrea fengið svör, þótt þau hefðu alls ekki verið draumasvör.

Fjórða og síðasta sagan í þriðju þáttaröð Leitarinnar að upprunanum verður sögð á Stöð 2 í kvöld klukkan 19:10. Þar verður saga Sigurðar Donys Sigurðssonar Vopnfirðings sögð sem á ættir að rekja til Gvatemala.

Í þættinum Á bak við tjöldin á Vísi er kafað dýpra í áhugaverða þætti og kvikmyndir. Þáttinn má heyra hér að neðan.