Eigendur sjávarútvegsfyrirtækjanna Vísis hf. og Þorbjarnar hf. hafa hafið viðræður um að leggja eignir félaganna inn í nýtt fyrirtæki og standa saman að rekstri nýs sjávarútvegsfyrirtækis í Grindavík. Ef af verður verður nýtt félag með rúmlega 44.000 tonn af aflaheimildum, um það bil 16 milljarða króna veltu og vel yfir 600 manns í vinnu.

Greint er frá þessum fyrirætlunum í yfirlýsingu frá forsvarsmönnum félaganna tveggja. Þar segir að markmið eigendanna, sem allir verða áfram hluthafar, sé að tryggja bolfiskvinnslu og styrkja samfélagið í Grindavík enn frekar.

Eigendurnir áætla að samruninni muni taki allt að 3 ár og segjast þeir ekki reikna með uppsögnum í tengslum við hann, „þó má að sjálfsögðu gera ráð fyrir breytingum á útgerðarháttum og mögulega einhverjum tilfærslum á störfum á þeim tíma,“ eins og það er orðað.

Eigendurnir segja aukinheldur að gangi viðræður um stofnun nýs félags samkvæmt áætlun megibúast við að það taki til starfa um áramót, en þangað til verði rekstur fyrirtækjanna tveggja óbreyttur.