Catalina gerir átján milljóna króna bótakröfu

Catalina Ncogo, sem dæmd var fyrir milligöngu um vændi árið 2010, krefur Geymslur um átján milljónir króna vegna tjóns sem hún segist hafa orðið fyrir í brunanum í Garðabæ í apríl 2018.

„Ég missti allt innbúið mitt og allar eigur mínar á Íslandi í brunanum. Þetta er mjög sorglegt allt saman,“ sagði Catalina í samtali við Þórarinn Þórarinsson á Fréttablaðinu í gær.

Catalina varð þekkt sem vændiskona á Íslandi fyrir rúmum áratug eftir að hafa flutt til Íslands með íslenskum manni frá Miðbaugs-Gíneu. Voru viðskipti hennar orðin svo umfangsmikil að fleiri konur gengu til liðs við starfsemi hennar sem rekin var á Hverfisgötu, næsta húsi við lögreglustöðina í Reykjavík.

Skaðabótaskylda ekki viðurkennd

Var hún ákærð fyrir mansal en sýknuð af þeim ákærulið. Þá hlaut hún dóma fyrir að hrækja á lögreglumann og að ráðast á nágranna sem var að ryksuga ganginn í fjölbýlishúsi. Hlaut hún fimmtán mánaða dóm en hafði áður verið dæmd í tveggja og hálfs árs fangelsi fyrir hagnýtingu vændis og fíkniefnabrot.

Catalina tjáir Þórarni, sem skrifaði ævisögu Catalinu á sínum tíma - Hið dökka man, að hún hafi selt íbúð sína hér á landi eftir að hafa setið af sér dóma sína. Hún hafi komið eignum sínum í geymslu en dvalið mikið erlendis. Allt sem hún hafi unnið sér inn hafi fuðrað upp í brunanum.

Mál Catalinu verður tekið fyrir í Héraðsdómi Reykjavíkur í byrjun október. Þar gæti verið við ramman reip að draga vegna þess að Geymslur hafa þegar verið sýknaðar í sambærilegu máli. Málskostnaður var þó felldur niður í málinu.

Í málinu var aðeins deilt um bótaskyldu fyrirtækisins sem var ekki viðurkennd. Voru Geymslur sýknaðar á þeirri forsendu að um húsaleigusamning væri að ræða aðila á milli en ekki geymslusamningur. Það var sérstaklega tekið fram í samningnum.

„Við sögðum að þarna væri verið að koma sér undan lögunum með þessu en dómurinn féllst ekki á það,“ sagði Guðni Á. Haraldsson lögmaður, sem gætti réttinda stefnenda í málinu, eftir að dómur var kveðinn upp í júní. Málinu var áfrýjað til Landsréttar.

Vitjaði munanna

Ólafur Valur Guðjónsson lögmaður sem gætir hagsmuna Catalinu segir í samtali við Vísi að mál hennar sé auðvitað áþekkt fyrrnefndu máli. Sá munur sé þó á að Catalina hafi á sínum tíma farið og vitjað eignanna sem hafi verið til að einhverju leyti.

„Það var auðvitað allt ónýtt vegna reykskemmda og vatnsskemmda,“ segir Ólafur en í framhaldinu hafi þau fengið kunnáttumann til að meta tjónið. Fyrir vikið geti þau gert fjárkröfu en það hafi sumir aðrir ekki getað því allt hafi fuðrað upp.