Yngsti og elsti keppandi Íslendinga á heimsleikunum í CrossFit eru báðir á toppnum fyrir lokadaginn

Íslendingar gætu eignast tvo aldursflokkameistara á heimsleikunum í CrossFit er lokadagurinn á heimsleikunum fer fram í Madison, höfuðborg Wisconsin-fylkis í Bandaríkjunum.

Íslendingar eru efstir í bæði yngsta (14-15 ára) og elsta flokkunum (60+) á heimsleikunum í CrossFit fyrir lokadaginn.

Þetta eru þeir Brynjar Ari Magnússon sem hefur 20 stiga forystu í flokki 14 til 15 ára og Hilmar Harðarson sem hefur 30 stiga forystu í flokki 60 ára og eldri.

Lokadagurinn fer fram í dag og Íslendingar gætu einnig unnið til gullverðlauna í karla- og kvennaflokki en þar á Ísland fína möguleika fyrir lokadaginn.

Björgvin Karl Guðmundsson er í 3. sætinu fyrir lokadaginn og Katrín Tanja Davíðsdóttir er í því fimmta. Þuríður Erla Helgadóttir er í níunda sætinu.

Fylgst verður með leikunum í beinni útsendingu á Vísi sem og Stöð 2 Sport 3.